١١٧٩: یحییٰ بن سعید کہتے ہیں کہ عبدالرحمن بن القاسم نے کہا کہ میں نے قاسم کو بسم اللہ پڑھتے نہیں سنا (یعنی ابتداء قراءت میں جہراً ) امام طحاوی (رح) فرماتے ہیں جب یہ بات جناب رسول اللہ (صلی اللہ علیہ وآلہ وسلم) اور ان حضرات سے ثابت ہوگئی جن کا ہم نے بسم اللہ کے جہر کو ترک کرنے کے سلسلے میں تذکرہ کیا ہے تو اس سے یہ بات ثابت ہوگئی کہ یہ قرآن سے نہیں ہے اگر یہ قرآن مجید سے ہوتی تو اس کو بھی اسی طرح جہراً پڑھا جاتا جیسے اس کے علاوہ قرآن مجید کو جہراً پڑھا جاتا ہے۔ کیا تم یہ نہیں دیکھتے کہ سورة نمل میں بسم اللہ الرحمن الرحیم کی کو اسی طرح جہراً پڑھا جاتا ہے جس طرح کہ سورة نمل کی بقیہ آیات کو۔ پس جب یہ بات ثابت ہوگئی کہ بسم اللہ کو فاتحہ سے پہلے آہستہ پڑھا جائے تو یہ بات بھی ثابت ہوگئی کہ یہ قرآن مجید سے نہیں ہے اور بطور ذکر کے اس کو بھی تعوذ اور ثناء کی طرح آہستہ پڑھا جائے گا اور ہم نے بسم اللہ کو قرآن مجید میں فاتحۃ الکتاب سے پہلے بھی اسی طرح لکھا ہوا دیکھا جیسا کہ دیگر سورتوں میں۔ جب سورة فاتحہ کے علاوہ سورتوں کی یہ آیت نہیں تو اس سے یہ بات ثابت ہوگئی کہ یہ فاتحہ کی بھی آیت نہیں اور یہ دونوں قول نماز میں بسم اللہ کا جہر سے نہ پڑھنا اور بسم اللہ کا فاتحہ کا جزء نہ ہونا امام ابوحنیفہ ‘ ابو یوسف ‘ محمد بن حسن (رح) کے قول ہیں۔
حاصل روایات : جب جناب رسول اللہ (صلی اللہ علیہ وآلہ وسلم) اور صحابہ (رض) وتابعین (رح) سے یہ بات ثابت ہو رہی ہے کہ بسم اللہ کو جہراً نہ پڑھا جائے گا تو اس سے یہ بات بھی ثابت ہوگئی کہ وہ قراءت کا حصہ نہیں اگر وہ فاتحہ کا جز ہوتی تو اس کا جہر اسی طرح ضروری تھا جیسا دوسری
قراءت کو جہراً پڑھا جاتا ہے چنانچہ دیکھیں سورة نمل کی آیت میں جب اس آیت کی جہراً تلاوت کرتے ہیں تو بسم اللہ کو جہراً پڑھتے ہیں جیسا دیگر آیات قرآن کو جہراً پڑھا جاتا ہے۔
جب یہ بات ثابت ہوگئی کہ فاتحہ سے پہلے اس کو آہستہ پڑھا جائے گا اور قرآن مجید کو تو جہراً پڑھا جاتا ہے اس سے ثابت ہوا کہ یہ قرآن مجید کی قراءت کا حصہ نہیں اور اس کو اسی طرح آہستہ پڑھا جائے گا جیسا دیگر ادعیہ تعوذ وغیرہ کو سراً پڑھتے ہیں۔
نظر طحاوی (رح) :
قرآن مجید کی تمام سورتوں کے شروع میں سوائے سورة توبہ کے بسم اللہ کو لکھا جاتا ہے جب دوسری سورتوں کے شروع میں لکھنے سے ان کی آیت نہیں بنتی تو فاتحہ کے شروع میں لکھنے سے اس کی آیت کس طرح بن جائے گی پس اس سے ثابت ہوا کہ یہ فاتحۃ الکتاب کی بھی آیت نہیں تو نماز میں اس کو جہراً بھی نہ پڑھا جائے گا اور ہمارے ائمہ ثلاثہ ابوحنیفہ و ابویوسف و محمد بن الحسن (رح) کا تو یہی مسلک ہے واللہ الموافق۔
نوٹ : اس باب میں صاحب کتاب نے فریق ثانی کے دلائل کو جب خوب مضبوط کردیا اور بسم اللہ قراءت کا جز نہ ہونا ثابت ہوگیا تو اس کا سراً پڑھنا بھی لازم ہوا۔