١٢٠٧: شریک ‘ ابو معاویہ اور وکیع نے اعمش سے روایت نقل کی ہے انھوں نے اپنی سند سے روایت نقل کی ہے۔
حاصل روایات : ان روایات سے ظہر و عصر میں قراءت کا ثبوت تو اظہر من الشمس ہوگیا ان میں روایت نمبر ١٢٠٦ میں اضطراب لحیہ کو قراءت کی دلیل قرار دینا ہمارے ہاں کچھ اچھی دلیل نہیں کیونکہ اضطراب لحیہ کے وقت تسبیح دعا وغیرہ سب مراد ہوسکتا ہے پس یہ احتمالی دلیل ثبوت مدعا کے لیے چنداں کافی نہیں البتہ دیگر روایات اس سلسلہ کی کافی دلیل ہیں جب ظہر و عصر کی قراءت یقینی طور پر ثابت ہوگئی تو ابن عباس (رض) والی روایت میں مذکور بات خود منتفی ہوگئی۔
نظر طحاوی (رح) :
تنویر موضوع کے لیے نظر کی طرف رجوع کرتے ہیں تاکہ ایک قول کی توثیق ہو کر مسئلہ واضح تر ہوجائے چنانچہ ہم دیکھتے ہیں کہ نماز میں قیام فرض ہے اور رکوع کا حکم بھی یہی ہے اور سجود بھی یہی حکم رکھتا ہے۔
نمبر ١: یہ تمام نماز کے فرائض ہیں ان میں سے کسی چیز کے ترک سے نماز نہیں ہوتی اور یہ فرائض تمام نمازوں میں برابر ہیں۔
نمبر ٢: اسی طرح ہمارے نزدیک قعدہ اول سنت (سنت سے ثابت) ہے اس میں کوئی اختلاف نہیں اس کی سنیت تمام نمازوں میں یکساں ہے۔ اسی طرح قعود اخیر میں علماء کا اختلاف ہے کہ وہ فرض ہے یا سنت (ثابت بالسنہ) لیکن اس بات پر سب متفق ہیں کہ تمام نمازوں میں اس کا حکم فرض یا سنت ہونے کا ایک ہے پس یہ چیزیں جو ایک نماز میں فرض ہیں وہ تمام میں فرض ہیں اور رات کی نماز میں جہری قراءت سنت ہے فرض نہیں اور نماز کا اس پر دارومدار بھی نہیں جیسا کہ رکوع و سجدہ ‘ قیام پر دارومدار ہے اسی لیے وہ بعض میں ثابت ہے اور بعض میں نہیں اور وہ جو کہ فرض ہے اور نماز کا اس پر مدار ہے نماز اس کے بغیر ہوتی ہی نہیں جب وہ چیزیں ایک نماز میں فرض ہیں تو بقیہ نمازوں میں بھی اسی طرح ہونی چاہئیں۔
اب ہم نے غور کیا کہ قراءت مغرب ‘ عشائ ‘ صبح میں تو مخالفین کے ہاں بھی واجب و فرض ہے اور اس کے بغیر چارہ کار نہیں اور نماز اس کے بغیر نہیں ہوسکتی تو بتقاضائے نظر ظہر و عصر میں بھی قراءت کا یہی حکم ہونا چاہیے اس عقلی دلیل سے ان لوگوں کی بات ہباء منثورا ہوگئی جو بقیہ نمازوں میں تو قراءت کو فرض مانتے ہیں مگر ظہر و عصر میں قراءت کے قائل نہیں۔
آخری بات :
اب اگر وہ لوگ قراءت کو ظہر و عصر کے فرائض ہی سے نہیں مانتے تو ان سے عرض کریں گے کہ مغرب و عشاء کی پہلی دو رکعتوں میں قراءت اور جہر کرنا دونوں کو آپ ضروری قرار دیتے ہیں اور پچھلی رکعات میں قراءت آہستہ مگر سنت کہتے ہیں جب پچھلی دو رکعتوں میں قراءت کم از کم سنت رہی اور جہر کے سقوط سے قراءت بالکل ساقط نہیں ہوئی تو اس پر نظر کرتے ہوئے ہم کہیں گے کہ ظہر و عصر میں بھی قراءت سنت رہے اور جہر کے ساقط ہونے سے قراءت بالکل ساقط نہ ہو تو عقلی اعتبار سے قراءت کا سقوط کسی لحاظ سے بھی درست نہ ہوا اور یہی امام ابوحنیفہ و ابو یوسف و محمد (رح) کا مسلک ہے۔