١٢٣ : ابوازھر بیان کرتے ہیں کہ حضرت معاویہ (رض) نے ہمیں جناب رسول اللہ (صلی اللہ علیہ وآلہ وسلم) کا وضو دکھلایا جب وہ مسح سر تک پہنچے تو انھوں نے اپنی دونوں ہتھیلیوں کو اپنے سر کے اگلی جانب رکھا پھر ان کو گزرارتے ہوئے گردن تک پہنچے پھر ان کو اسی مقام کی طرف پھیرتے ہوئے لوٹایا جہاں سے شروع کیا تھا ۔ بعض علماء کا مسلک ہے کہ نماز کے وضو میں تمام سر کا مسح فرض ہے۔ اس میں سے کسی حصہ کا ترک جائز نہیں ہے۔ انھوں نے ان آثار کو دلیل بنایا اور ان سے دیگر علماء نے اختلاف کرتے ہوئے کہا مندرجہ پیش کردہ آثار میں سے صرف اس قدر بات ہے کہ جناب رسول اللہ (صلی اللہ علیہ وآلہ وسلم) نے نماز کے وضو میں تمام سر پر مسح کیا پس ہم بھی وضو کرنے والے کو کہتے ہیں کہ وہ بھی نماز کے وضو میں اس کو اختیار کرے۔ مگر ہم تمام سر کے مسح کو فرض قرار نہیں دیتے اور جناب رسول اللہ (صلی اللہ علیہ وآلہ وسلم) کے عمل میں کوئی ایسی چیز نہیں کہ جو اس بات کو ثابت کرے کہ آپ (صلی اللہ علیہ وآلہ وسلم) نے تمام سر کا مسح اس لیے کیا کہ وہ فرض ہے۔ چنانچہ ہم دیکھتے ہیں کہ آپ (صلی اللہ علیہ وآلہ وسلم) نے تین تین مرتبہ وضو فرمایا مگر اس لیے نہیں کہ تین تین مرتبہ وضو فرض ہے اور اس سے کم جائز نہیں بلکہ اس لیے کہ اس کا کچھ حصہ ایک بار دھونا فرض ہے۔ اس سے کم جائز نہیں بلکہ اس لیے کہ اس میں سے کچھ ایک بار دھونا فرض ہے اور تین مرتبہ دھونا باعث فضیلت ہے۔ جناب رسول اللہ (صلی اللہ علیہ وآلہ وسلم) سے ایسی روایات بھی وارد ہیں کہ جن سے اس فریق کا مؤقف ثابت ہوتا ہے جو اس طرف گئے ہیں کہ مسح سر میں بعض حصہ فرض ہے۔
تخریج : ابو داؤد فی الطھارۃ باب ٥١‘
حاصل روایات : مذکورہ بالا روایات سے سر کی اگلی جانب سے لے کر گدی تک مسح میں استیعاب ثابت ہو رہا ہے چنانچہ امام مالک (رح) وغیرہ فرماتے ہیں کہ پورے سر کا مسح فرض ہے جیسا کہ ظاہر روایات بتلا رہا ہے اس میں سے کسی حصہ کا ترک نہ کرنا اس کی فرضیت کو ظاہر کرتا ہے۔
دلیل کا جواب :
ان روایات میں نماز کے لیے کئے جانے والے وضو میں تمام سر کا مسح ثابت ہو رہا ہے ہم بھی یہی کہتے ہیں کہ نماز کے لیے وضو کرنے والا ایسا کرے مگر ان آثار میں سے کوئی اثر بھی فرضیت کو ثابت نہیں کرتا ہم دیکھتے ہیں کہ آپ نے تین تین مرتبہ اعضاء وضو کو دھویا مگر وہ اس بناء پر نہیں کہ وہ فرض ہے کہ اس سے کم تر جائز نہ ہو بلکہ اس میں سے کچھ فرض اور کچھ زائد ہے جو کمال فضیلت کے حصول کے لیے ہے۔ اسی وجہ سے ایک ایک مرتبہ بھی ثابت ہے جو کہ فرض ہے اس سے کم ثابت نہیں بالکل اسی طرح آپ (صلی اللہ علیہ وآلہ وسلم) سے ایسے آثار ثابت ہیں جن میں سر کے مسح کی وہ مقدار جو کہ فرض ہے وہ مذکور ہے اور وہ بعض حصہ سر ہے معلوم ہوا کہ بعض فرض ہے۔