١٢٤٠: عمرو بن دینار نے حضرت جابر (رض) سے نقل کیا کہ معاذ بن جبل (رض) جناب نبی اکرم (صلی اللہ علیہ وآلہ وسلم) کے ساتھ نماز پڑھتے پھر لوٹ کر ہماری امامت کراتے ایک رات جناب نبی اکرم (صلی اللہ علیہ وآلہ وسلم) نے نماز عشاء میں تاخیر فرمائی پس معاذ نے ان کے ساتھ نماز ادا کی پھر ہمیں امامت کرانے کے لیے آئے تو سورة بقرہ شروع کردی جب لوگوں میں سے ایک آدمی نے یہ حالت دیکھی تو اس نے ایک طرف ہٹ کر اکیلے نماز ادا کرلی پس ہم نے کہا اے فلاں تجھے کیا ہوا کیا تو منافق ہوگیا ؟ وہ کہنے لگے میں منافق نہیں ہوا میں جناب رسول اللہ (صلی اللہ علیہ وآلہ وسلم) کی خدمت میں جا کر آپ کو ضرور اس بات کی اطلاع دوں گا پس وہ جناب نبی اکرم (صلی اللہ علیہ وآلہ وسلم) کی خدمت میں آیا اور کہنے لگایا رسول اللہ (صلی اللہ علیہ وآلہ وسلم) معاذ آپ کے ساتھ نماز پڑھتا ہے پھر لوٹ کر ہماری امامت کراتا ہے گزشتہ رات آپ نے نماز عشاء کو مؤخر فرمایا انھوں نے آپ کے ساتھ نماز پڑھی پھر وہ آئے اور ہمیں امامت کرانے لگے تو انھوں نے سورة البقرہ شروع کردی جب میں نے یہ حال دیکھا تو میں نے ایک طرف ہو کر اکیلے نماز پڑھ لی ہم اونٹوں پر پانی لاتے ہیں ہم اپنے جوڑ بند سے کام کاج کرتے ہیں (اور پیٹ پالتے ہیں) پس جناب رسول اللہ (صلی اللہ علیہ وآلہ وسلم) نے فرمایا اے معاذ کیا تو فتنے میں ڈالتا ہے یہ بات آپ نے دو مرتبہ دھرائی تم یہ یہ سورت پڑھ لیا کرو اور یہ سورتیں قصار مفصل کی ہیں ان میں حد بندی نہیں کرتا۔ جناب نبی اکرم (صلی اللہ علیہ وآلہ وسلم) نے حضرت معاذ بن جبل (رض) سے سورة بقرہ کی قراءت کا بوجھ ڈالنا ناپسند کیا اور فرمایا اے معاذ ! کیا تم لوگوں کو فتنے میں مبتلا کرتے ہو اور آپ نے مفصلات کا حکم دیا جو روایات میں مذکور ہوئیں اگر یہ نماز ‘ نمازِ مغرب ہو تو پھر یہ روایت زید ثابت (رض) والی روایت جو ابتلاء کے باب میں گزری اس کے خلاف ہے اور اگر اس سے عشاء مراد ہو تو وقت کی وسعت کے باوجود آپ نے اس میں اس کے پڑھنے کو ناپسند فرمایا۔ اب نماز مغرب اس بات کی زیادہ مستحق ہے کہ یہ قراءت اس میں مکروہ ہو اور جناب رسول اللہ (صلی اللہ علیہ وآلہ وسلم) سے اسی طرح کی سورتوں کا پڑھنا نماز عشاء میں وارد ہوا ہے۔
ہم نے عمرو بن دینار کو کہا کہ ابوالزبیر نے جابر (رض) سے بیان کیا کہ جناب رسول اللہ (صلی اللہ علیہ وآلہ وسلم) نے اس کو فرمایا تم سورة واللیل ‘ اذا یغشٰی ‘ والشمس وضحاھا اور والسماء ذات البروج ‘ والسماء والطارق میں سے کوئی سورة پڑھو تو اس پر عمرو بن دینار نے کہا اسی جیسی سورتیں مراد ہیں (کوئی مخصوص سورت مراد نہیں)
اس روایت میں جناب رسول اللہ (صلی اللہ علیہ وآلہ وسلم) نے افتّان انت یامعاذ فرما کر قراءت کی بوجھل کرنے والی مقدار کا انکار فرمایا اور مفصل کی سورتیں پڑھنے کا حکم فرمایا۔
ایک اشکال اور اس کا حل :
مندرجہ بالا روایت دو طرق سے وارد ہے ایک محارب بن دثار سے دوسری عمرو بن دینار سے اگر اول روایت کو لیں تو پھر یہ روایت زید بن ثابت کے خلاف ہے اور مغرب سے متعلق ہے اور دوسرے شاگرد عمرو بن دینار اس کو عشاء کی نماز بتلا رہے ہیں اس صورت میں اس سے مغرب پر استدلال چنداں مفید نہیں۔
الجواب : مغرب کی نماز مراد ہونے کی صورت میں چونکہ یہ قولی روایت ہے اور زید بن ثابت اور دیگر روایات کے متعلق کہہ چکے ان میں ان سورتوں کا جز بول کر کل مراد لیا گیا ہے پس اس قولی روایت کو ترجیح حاصل ہوگئی۔ اور اگر عمرو بن دینار کی روایت کے مطابق عشاء مراد ہو تو اس سے استدلال بطور دلالت النص ہوگا کہ جب وسیع وقت کے باوجود مختصر قراءت کا حکم فرمایا گیا تو مغرب کا وقت مختصر ہے اس میں تو بدرجہ اولیٰ اختصار قراءت کا لحاظ ہوگا پس مفصلات قصار سے پڑھنا افضل و اولیٰ ہوگا ہذا ہوالمراد۔ جیسا کہ یہ روایت شاہد ہے۔