١٢٧ : حضرت عبداللہ بن عباس (رض) کہتے ہیں حضرت علی (رض) بن ابی طالب تشریف لائے اور وہ پیشاب سے فارغ ہوئے تھے انھوں نے ایک برتن منگوایا جس میں پانی تھا اور فرمانے لگے اے ابن عباس ! کیا میں تمہارے سامنے اسی طرح وضو نہ کروں جس طرح میں نے جناب رسول اللہ (صلی اللہ علیہ وآلہ وسلم) کو وضو کرتے پایا میں نے کہا کیوں نہیں میرے ماں باپ آپ پر قربان ہوں پھر انھوں نے طویل روایت نقل کی جس میں تذکرہ ہے کہ انھوں نے پانی سے اپنے دو چلو بھرے پھر ان کو اپنے چہرے پر مارا پھر دوسری مرتبہ اور تیسری مرتبہ بھی اسی طرح کیا پھر انھوں نے اپنے دونوں انگوٹھے اس طرح کئے جیسے منہ میں لقمہ ڈالتے وقت کرتے ہیں اور ان کو اپنے دونوں کانوں کے اگلے حصہ میں ڈالا پھر اپنے دائیں ہاتھ میں پانی لے کر اپنی پیشانی پر ڈالا پھر اسے چہرے پر بہنے کے لیے چھوڑ دیا پھر اپنا دایاں ہاتھ تین مرتبہ کہنی سمیت دھویا اور بایاں بھی اسی طرح دھویا پھر اپنے سر پر مسح کیا اور اپنے کانوں کی پچھلی جانب مسح کیا۔ بعض علماء کا اس روایت پر عمل ہے وہ کہتے ہیں کہ کانوں کا جو حصہ سامنے کی جانب ہے اس کا حکم تو چہرے والا ہے اسے چہرے کے ساتھ دھویا جائے گا اور جو اس میں سے پچھلا حصہ ہے اس کا حکم سر والا ہے اس کا سر کے ساتھ مسح کریں گے۔ علماء کی دوسری جماعت نے اس سلسلہ میں ان سے اختلاف کیا ہے اور انھوں نے کہا دونوں کان سر سے ہیں ان کے اگلے اور پچھلے حصہ پر سر کے ساتھ ہی مسح کیا جائے گا۔ انھوں نے ان روایات سے دلیل لی ہے۔
امام طحاوی نے اس باب میں کیفیت مسح علی الاذنین کو بیان کیا ہے اس میں معروف دو قول ہیں نمبر ١ عامر شعبی ‘ ابن سیرین اور نخعی (رح) وغیرہ کا ہے کہ اگلا حصہ چہرے کے ساتھ دھلنے کے حکم میں ہے اور پچھلا حصہ سر کے ساتھ مسح کے حکم میں ہے۔
نمبر ٢ دوسرا قول ائمہ اربعہ اور جمہور علماء کا ہے کہ کان سر کے ساتھ مسح کے حکم میں ہیں۔
اللغات : اراق المائ۔ پیشاب کرنا۔ حفنۃ دونوں چلو جمع کرنا۔ صک۔ چہرے پر مارنا۔ القم ابھامیہ۔ دونوں انگوٹھوں کو لقمہ لینے کی طرح بنانا۔ صب۔ بہنا۔ بہانا۔ تستن۔ ٹپککر بہنا۔ ظہور اذن۔ کان کا پچھلا حصہ۔
تخریج : ابو داؤد فی الطھارۃ باب ٥١‘ مسند احمد ١؍٨٣
حاصل روایات : کانوں کا اگلا حصہ چہرہ کے ساتھ دھویا اور صاف کیا اور پچھلا حصہ سر کے مسح کے ساتھ مسح کیا اس سے ثابت ہوا کہ سامنے کا حکم چہرے والا اور مؤخر کا حکم سر والا ہے۔
جواب دلیل :
ابن عباس (رض) کی روایت کے خلاف خود ان کا فتویٰ آئندہ سطور میں مذکور ہے جو کہ ان کی روایت کے منسوخ ہونے کی دلیل ہے فتدبر۔
قول ثانی کے دلائل
کانوں کا مسح کیا جائے گا۔