١٣٣٥: ابراہیم نے اسود سے نقل کیا کہ میں اور علقمہ عبداللہ (رض) کی خدمت میں گئے تو آپ نے فرمایا کیا ان لوگوں نے تمہارے پیچھے نماز ادا کرلی ہے ؟ ہم نے کہا جی ہاں۔ تو فرمایا پس تم نماز پڑھو۔ (یعنی میرے ساتھ نفلی نماز) چنانچہ انھوں نے ہمیں نماز پڑھائی ہمیں اذان و اقامت کا حکم نہیں فرمایا ہم ان کے پیچھے کھڑے ہوئے تو انھوں نے ہمیں آگے بڑھایا ایک کو دائیں اور ایک کو بائیں جانب کھڑا کیا جب انھوں نے رکوع کیا تو دونوں ہاتھوں کو اپنی ٹانگوں کے مابین رکھا اور جھکے اسود کہتے ہیں انھوں نے میرے دونوں ہاتھوں کو میرے گھٹنوں پر مارا اور اپنے ہاتھ سے ملانے کا اشارہ کیا جب نماز پڑھا چکے تو فرمانے لگے۔
حاصل روایات : جب تم تین ہو تو برابر میں کھڑے ہو کر نماز پڑھا کرو اور اگر اس سے تعداد بڑھ جائے تو ایک کو آگے بڑھا دیا جائے اور وہ تطبیق کرے پھر وہ اپنی رانوں کے درمیان دونوں بازوؤں کو پھیلا لے گویا (یہ معاملہ مجھے اس طرح مستحضر ہے) کہ میں جناب رسول اللہ (صلی اللہ علیہ وآلہ وسلم) کی انگشت مبارکہ کو اب بھی دیکھ رہا ہوں۔
تخریج : مسلم ١؍٢٠٢۔
نوٹ : یہ روایت مسئلہ تطبیق میں ظاہر ہے وہ ان تینوں سے بلا تامل ثابت ہے۔
مؤقف ِثانی :
اس کو ائمہ اربعہ اور جمہور فقہاء و محدثین نے اختیار کیا کہ تطبیق نہیں بلکہ انگلیوں کو کھول کر گھٹنے پھر اس طرح رکھ لیں جیسے کوئی آدمی گھٹنوں کو تھامنے والا ہو اور انگلیوں کو کھول لے۔