١٣٩١: سمی نے ابو صالح سے انھوں نے ابوہریرہ (رض) سے روایت کی ہے کہ جناب رسول اللہ (صلی اللہ علیہ وآلہ وسلم) نے فرمایا جب امام : سَمِعَ اللّٰہُ لِمَنْ حَمِدَہٗ ، کہے تو تم : رَبَّنَا وَلَکَ الْحَمْدُ کہو پس جس کا قول ملائکہ کے قول کے موافق ہوا تو اس کے گزشتہ گناہ معاف کردیئے جائیں گے۔ کچھ علماء نے یہ فرمایا کہ ان آثار سے معلوم ہوتا ہے کہ امام و مقتدی کیا کہیں ‘ جناب رسول اللہ (صلی اللہ علیہ وآلہ وسلم) کا ارشاد یہ ہے کہ جب امام سمع اللہ لمن حمدہ کہے تو تم ربنا لک الحمد کہو اس سے یہ دلیل میسر آگئی کہ امام صرف سمع اللہ لمن حمدہ کہے گا اور مقتدی ربنا لک الحمد فقط کہیں گے۔ اس قول کو امام ابوحنیفہ ومالک (رح) نے اختیار کیا۔ دوسروں نے ان سے اختلاف کرتے ہوئے کہا کہ امام سمع اللہ لمن حمدہ ربنا ولک الحمد ساتھ کہے مقتدی صرف ربنا و لک الحمد صرف کہے۔ فریق اوّل کہتی ہے کہ جناب رسول اللہ (صلی اللہ علیہ وآلہ وسلم) کے ارشاد ” اذا قال الامام سمع اللّٰہ لمن حمدہ فقولوا ربنا لک الحمد “ میں اس بات کی کوئی دلیل نہیں کہ یہ صرف امام کہے دوسرا نہ کہے۔ اگر اسی طرح ہوتا تو ناممکن کہ اس کو وہ شخص بھی کے جو مقتدی نہ ہو۔ مگر ہم دیکھتے ہیں کہ تمہارا اس بات پر تو اتفاق ہے اکیلا نماز پڑھنے والے اسے سمع اللہ سمیت کہے۔ پس جب اکیلا نماز ادا کرنے والا جو کہ مقتدی نہیں۔ اور جناب رسول اللہ (صلی اللہ علیہ وآلہ وسلم) کا قول جو ہم نے ذکر کیا وہ اس کی نفی نہیں کرتا۔ اسی طرح امام کے متعلق بھی ارشاد رسول اللہ (صلی اللہ علیہ وآلہ وسلم) میں نفی نہیں ‘ پس وہ بھی کہے۔ اور انھوں نے ان روایات کو دلیل بنایا۔
تخریج : بخاری ١؍٢٧٤‘ مسلم ١؍١٧٦‘ ابو داؤد ١؍١٢٣‘ ترمذی ١؍٦١‘ نسائی ١؍١٦٢۔
حاصل روایات : کہ امام کا وظیفہ سَمِعَ اللّٰہُ لِمَنْ حَمِدَہُ اور مقتدی کا وظیفہ رَبَّنَا وَلَکَ الْحَمْدُ ہے اور اس وظیفے کو بدلنا جائز نہیں ہے۔ اس قول کو امام ابوحنیفہ ومالک (رح) نے اختیار کیا ہے۔
نوٹ : یہ پہلا موقعہ ہے کہ امام ابوحنیفہ اور مالک (رح) کا نام ذکر کیا ورنہ اب فریق اوّل کا تذکرہ بغیر نام کے کرتے رہے کیا خوب احترام امام (رح) کا انداز ہے۔
مؤقف ِثانی :
امام سمع اللہ لمن حمدہ اور ربنا ولک الحمد دونوں کہے گا پھر مقتدی ربنا لک الحمد صرف کہے گا ان روایات سے انھوں نے استدلال کیا ہے روایات کو بیان کرنے سے پہلے فریق اوّل کی روایات کا جواب دیا جاتا ہے۔
جواب : روایت ابو موسیٰ (رض) میں کوئی ایسی عبارت نہیں کہ جس سے یہ ثابت ہو سکے کہ تحمید صرف مقتدی کا وظیفہ ہے اور کوئی نہیں کہہ سکتا اگر اس کو مان لیا جائے تو یہ تسلیم کرنا پڑے گا کہ کوئی غیر مقتدی اس کو نہ کہے حالانکہ اس بات پر اجماع ہے کہ منفرد دونوں کو کہے گا جب منفرد دونوں کو کہے گا تو امام بھی منفرد کی طرح ہے اور غیر مقتدی بھی ہے۔ تو اسے ان دونوں کا کہنا کیونکر ممنوع ہوگا۔
مؤقف ثانی :
امام ہر دو کو کہے اور مقتدی صرف ربنا لک الحمد کہے گا یہ روایات اس کی دلیل ہیں۔