١٤٥٤: ابراہیم نے اسود سے نقل کیا کہ جناب عمر (رض) جب کفار سے جنگ میں مصروف ہوتے تو قنوت پڑھتے اور جب محاربہ کے ایام نہ ہوتے تو قنوت نہ پڑھتے تھے۔ تو حضرت اسود (رح) نے جناب فاروق (رض) کے قنوت کا سبب بتلایا کہ محاربہ اور جنگ کی حالت میں آپ دشمن کے خلاف اللہ تعالیٰ سے مدد چاہتے اور استعانت طلب کرتے جس طرح جناب رسول اللہ (صلی اللہ علیہ وآلہ وسلم) نے کیا تھا اور آپ یہ کرتے رہے یہاں تک کہ { لیس لک من الامر شیٔ} آیت نازل ہوئی۔ چنانچہ حضرت عبدالرحمن بن ابی بکر (رض) فرماتے ہیں کہ اس کے بعد جناب رسول اللہ (صلی اللہ علیہ وآلہ وسلم) نے کسی کے لیے بد دعا نہیں فرمائی۔ پس حضرت عبدالرحمن اور ابن عمر (رض) کے نزدیک آیت { لیس لک } نے نماز میں کسی کے لیے بھی بد دعا کو منسوخ کردیا جبکہ حضرت عمر (رض) کے عمل سے ثابت ہوتا ہے کہ ان کے نزدیک یہ آیت لڑائی سے قبل مانگی جانے والی دعا کو منسوخ نہیں کرتی۔ البتہ جنگ کے علاوہ دشمن کے لیے بد دعا منسوخ ہوگئی ‘ مگر اس بات سے ان حضرات کے قول کا ابطال ضرور ہوگیا کہ نماز فجر میں قنوت پڑھنے کا قول کرتے ہیں۔ حضرت عمر (رض) کے قول کی تشریح اسی طرح ہے۔ مگر حضرت علی (رض) سے اس سلسلہ میں اس طرح روایت آئی ہے۔
تخریج : مسند ابوحنیفہ ١؍٨٣۔
عمری قنوت کی حقیقت :
اس روایت اسود نے اس بات کی نشاندہی کردی کہ عمر (رض) قنوت اس وقت کرتے جب دشمن سے لڑائی کا موقعہ ہوتا دشمنان دین کے لیے بددعا فرماتے اور اللہ تعالیٰ سے مسلمانوں کے لیے استعانت و نصرت طلب کرتے جیسا کہ جناب رسول اللہ (صلی اللہ علیہ وآلہ وسلم) نے کیا جبکہ آپ کے اصحاب میں سے ستر قراء کو مظلومانہ طور پر شہید کردیا گیا اور یہ دعا اس آیت کے نزول تک مانگتے رہے : لیس لک من الامر شیء او یتوب علیہم او یعذبہم فانہم ظالمون (آل عمران)
عبدالرحمن بن ابی بکر کہتے ہیں کہ اس کے بعد جناب رسول اللہ (صلی اللہ علیہ وآلہ وسلم) نے کسی کے حق میں بددعا نہیں فرمائی گویا یہ آیت عبدالرحمن بن ابی بکر اور ابن عمر (رض) اور بعض دیگر حضرات کے ہاں قنوت والے حکم کی ناسخ تھی مگر عمر (رض) کے ہاں قتال سے پہلے جتنا حکم تھا اس کی ناسخ نہیں تھی ان کے ہاں دشمن سے لڑائی نہ ہونے کی حالت میں بددعا منسوخ ہوئی تھی۔
حاصل کلام : یہ ہے کہ حضرت عمر (رض) کے ہاں قنوت ایام محاربہ کے لیے اب بھی باقی ہے البتہ ہمیشہ نماز فجر میں قنوت درست نہیں۔ پس فریق اوّل کے ہاں ہمیشہ نماز فجر میں قنوت کا قول درست نہ رہا۔