١٥٠٩: عیسیٰ بن عبدالرحمن عدوی نے عباس بن سہل سے انھوں نے ابو حمید ساعدی (رض) سے روایت کی ہے کہ وہ اصحاب رسول اللہ (صلی اللہ علیہ وآلہ وسلم) کو کہنے لگے میں جناب رسول اللہ (صلی اللہ علیہ وآلہ وسلم) کی نماز کو تم میں سب سے زیادہ جاننے والا ہوں انھوں نے کہا یہ کیسے ؟ تو وہ کہنے لگے کہ میں نے خوب جانچ کر دیکھا یہاں تک کہ میں نے آپ کی نماز کو خوب محفوظ کرلیا ابو حمید کہنے لگے جب جناب رسول اللہ (صلی اللہ علیہ وآلہ وسلم) نماز کے لیے اٹھتے تو تکبیر کہتے اور اپنے ہاتھوں کو چہرے کے برابر اٹھاتے پھر جب رکوع کی تکبیر کہتے تو دوبارہ اسی طرح کرتے اور جب رکوع سے سر اٹھاتے تو سمع اللہ لمن حمدہ کہتے اور ربنا ولک الحمد کہتے جب سجدہ کرتے تو اپنی رانوں کو پیٹ سے الگ رکھتے اس کا بوجھ کسی ران پر نہ ڈالتے اور اپنے دونوں بازؤں کو زمین پر نہ بچھاتے جب تشہد کے لیے بیٹھتے تو بائیں پاؤں کو لٹاتے اور دائیں پاؤں کو ٹھیک و سیدھا اور تشہد پڑھتے۔ یہ ابو حمید کی روایت کی اصل ہے اور اس میں بھی بیٹھنے کا تذکرہ اسی انداز سے ہے جیسا حضرت وائل (رض) کی روایت میں ہے اور وہ جس کو ابو حمید سے محمد بن عمرو نے بیان کیا وہ نہ تو معروف ہے اور نہ متصل ہے کیونہ اس روایت میں یہ ہے کہ وہ خود ابو حمید اور ابو قتادہ کی خدمت میں حاضر ہوا حالانکہ ابو قتادہ کی وفات تو اس سے عرصہ پہلے ہوچکی تھی کیونکہ وہ حضرت علی کے ساتھ لڑائی میں شریک ہو کر شہید ہوئے اور حضرت علی (رض) نے ان کی نماز جنازہ ادا کی ‘ محمد بن عمرو کی عمر ہی اس وقت کیا تھی کہ وہ ان کی مجلس میں حاضر ہوتا۔ دوسری بات یہ ہے کہ ابو حمید کی متصل روایت وائل کی رایت کے موافق ہے۔ پس اسی کو اختیار کرنا ضروری ہے اس کی مخالفت درست نہیں جبکہ نظر وفکر کے لحاظ سے بھی اسی کی پختگی ثابت ہوتی ہے وہ اس طرح کہ ہم دیکھتے ہیں نماز میں پہلا قاعدہ اور دونوں سجدوں کے درمیان بیٹھنا بھی پایا جاتا ہے اور وہ اسی طرح ہے کہ بائیں پاؤں کو بٹھا کر اسی پر بیٹھتے ہیں صرف آخری قعدہ میں اختلاف ہے۔ تو وہ دو حالتوں سے خالی نہیں یا وہ سنت ہے یا فرض ‘ اگر وہ سنت ہے تو اس کا حکم پہلے قعدہ کی طرح ہے اور اگر وہ فرض ہے تو اس کا حکم دونوں سجدوں کے درمیان والے قعدہ کی طرح ہے۔ پس اس سے وائل ابن حجر والی روایت میں جو مذکور ہے وہ ثابت ہوگیا اور وہی امام ابوحنیفہ امام ابویوسف اور محمد (رح) کا قول ہے اور ابراہیم نخغی (رح) نے اسی کو اختیار کیا ہے۔ ملاحظہ ہو۔
حاصل روایات : یہ ابو حمید ساعدی (رض) کی روایات میں سے اصل ہے اس میں قعود کا تذکرہ اسی طرح سے ہے جس طرح کہ وائل بن حجر (رض) کی روایت میں ہے اور جس کو محمد بن عمرو نے بیان کیا ہے وہ غیر معروف ہے اور ہمارے ہاں ابو حمید سے اس کا اتصال بھی نہیں ہے۔
عدم اتصال کے وجوہ :
نمبر !: اس میں یہ مذکور ہے کہ وہ ابو حمید اور ابو قتادہ کی خدمت میں حاضر ہوا حالانکہ ابو قتادہ (رض) کی وفات اس سے طویل زمانہ پہلے ٤٠ ؁ھ میں ہوچکی تھی۔
نمبر ": ابو قتادہ (رض) جن کی خدمت میں حاضری بتلائی جا رہی ہے وہ علی (رض) کے ساتھ ان کے زمانہ میں شہید ہوئے اس وقت تو محمد بن عمرو بن عطاء کی پیدائش بھی نہ ہوئی تھی سماع حدیث تو بہت دور کی بات ہے۔ اس کی پیدائش ٤٤ ؁ھ میں ہوئی۔
فیصلہ کن مرحلہ :
جب ابو حمید ساعدی (رض) کی متصل روایت وائل بن حجر (رض) کی روایت کے موافق ہے تو فریق ثالث کی بات اس سے ثابت ہوگئی اسی کو اپنانا چاہیے اس کی خلاف ورزی نہ ہونی چاہیے۔
نظر طحاوی (رح) :
قعدہ اولیٰ نماز کا حصہ ہے اس پر غور کیا اور جلسہ میں غور کیا کہ جب اس میں بالاتفاق بائیں پاؤں کو بچھا کر اس پر بیٹھتے ہیں۔ اب رہا قعدہ اخیرہ جس میں اختلاف کیا گیا تو اس کی دو حالتیں ہیں یا وہ فرض ہے یا سنت اگر وہ سنت ہے تو اس کا حکم قعدہ اولیٰ جیسا ہوگا اور اگر وہ فرض ہے تو اس کا حکم جلسہ جیسا ہونا چاہیے تو ہر دو صورت میں نظر بھی وائل بن حجر (رض) کی روایت ہی کے موافق ہے۔
یہی امام ابوحنیفہ ‘ ابو یوسف ‘ محمد (رح) کا قول ہے۔