١٥١٧: ابو وائل نے ابن مسعود (رض) سے نقل کیا کہ ہم جب نبی اکرم (صلی اللہ علیہ وآلہ وسلم) کے پیچھے نماز پڑھتے تو کہتے السلام علی اللہ السلام علی جبرائیل السلام علی میکائیل۔ (جب آپ نے یہ سنا) تو ہماری طرف متوجہ ہوئے اور فرمایا اس طرح نہ کہو السلام علی اللّٰہ ۔ اللہ تعالیٰ کی ذات السلام ہے بلکہ تم اس طرح کہا کرو۔ التحیات اللہ والصلوات والطیبات السلام علیک ایہا النبی ورحمۃ اللہ وبرکاتہ السلام علینا وعلی عباد اللہ الصالحین اشہد ان لاالٰہ الا اللہ واشہد ان محمداً عبدہ ورسولہ تمام قولی فعلی و مالی عبادات اللہ تعالیٰ ہی کے لیے ہیں تم پر سلام ہو اے نبی ! اور اللہ تعالیٰ کی رحمت و برکت ہم پر سلام ہو اور اللہ تعالیٰ کے نیک بندوں پر۔ میں گواہی دیتا ہوں کہ اللہ تعالیٰ کے سوا کوئی معبود نہیں اور گواہی دیتا ہوں کہ محمد (صلی اللہ علیہ وآلہ وسلم) اس کے بندے اور رسول ہیں۔
تخریج : بخاری فی الاذان باب ١٤٨‘ نمبر ١٥٠‘ الاستیذان باب ٣‘ والدعوات باب ١٦‘ التوحید باب ٥‘ مسلم فی الصلاۃ نمبر ٥٦‘ ابو داؤد فی الصلاۃ باب ١٧٨‘ نمبر ٩٦٨‘ ترمذی فی الدعوات باب ٨٢‘ نسائی فی التطبیق باب ١٠٠‘ والسہو باب ٥٦‘ ابن ماجہ فی الاقامہ باب ٢٤‘ نمبر ٨٩٩‘ مسند احمد ١؍٤١٣۔