١٦٢٧: عقبہ بن مسلم نے ابن عمر (رض) سے سوال کیا کہ وتر کس کیفیت سے ؟ تو انھوں نے فرمایا کیا تم دن کے وتروں کو جانتے ہو ؟ میں نے کہا جی ہاں ! وہ نماز مغرب ہے تو انھوں نے فرمایا تم نے درست جواب دیا یا فرمایا بہت خوب جواب دیا پھر کہنے لگے ہم مسجد میں تھے کہ ایک آدمی نے کھڑے ہو کر جناب رسول اللہ (صلی اللہ علیہ وآلہ وسلم) سے وتر یا رات کی نماز کا سوال کیا تو جناب رسول اللہ (صلی اللہ علیہ وآلہ وسلم) نے فرمایا رات کی نماز دو دو ہے جب تمہیں صبح کا خدشہ ہو تو ایک رکعت ساتھ ملا کر اس کو طاق بنا لو۔ کیا یہ بات تمہارے سامنے نہیں کہ جب حضرت عقبہ (رض) نے ابن عمر (رض) سے وتروں سے متعلق سوال کیا تو انھوں نے فرمایا کیا تم دن کے وتروں کو جانتے ہو۔ یعنی یہ بھی ان کے مشابہ ہیں۔ اس میں اس بات کی اطلاع ہے کہ حضرت ابن عمر (رض) کے ہاں وتر تین رکعت نماز مغرب کی طرح ہیں کیونکہ آپ نے رات کے وتروں سے متعلق سوال کرنے والے کو فرمایا کیا تم دن کے وتروں کو جانتے ہو اور وہ نماز مغرب ہے۔ اس کے بعد جناب رسول اللہ (صلی اللہ علیہ وآلہ وسلم) سے وہ بات بیان کی جس کو ہم ذکر کر آئے۔ پس اس سے یہ نتیجہ نکلا کہ آپ کا یہ فرمان ایک کے ساتھ وتر بنا لو۔ یعنی جو کچھ پہلے پڑھا ہے اس کے ساتھ ایک رکعت ملا کر ان کو وتر بنا لو یہ مجموعہ طاق ہوگا۔ یہ بات آئندہ روایت میں واضح ہے۔
تخریج : بخاری فی الوتر باب ١‘ مسلم فی المسافرین حدیث ١٤٥‘ ابو داؤد فی صلوۃ السفر باب ٢٤‘ نمبر ١٣٢٦‘ نسائی فی قیام اللیل باب ٣٥‘ موطا ومالک قیام اللیل نمبر ١٣‘ مسند احمد ٢؍١٣٣۔
حاصل روایات : حضرت ابن عمر (رض) نے عقبہ بن مسلم کے سوال کے جواب وتر نہار کا حوالہ دیا اور بتلا دیا کہ ہر دو وتر ایک طرح ہیں تو اس سے واضح ہو رہا ہے کہ حضرت ابن عمر (رض) کے ہاں وتر کی نماز مغرب کی طرح تین پڑھی جائیں گی۔ اور ان میں سلام سے انقطاع نہ ہوگا پھر اس بات کو انھوں نے قول رسول اللہ (صلی اللہ علیہ وآلہ وسلم) کے ذریعہ ثابت فرمایا کہ دو رکعتوں کے ساتھ ایک کو ملا دو اور کل تین رکعت بن جائیں گی اور جس طرح مغرب میں سلام کا فاصلہ نہیں اسی طرح ان میں بھی فاصلہ بالسلام نہ ہوگا پس ثابت ہوا ابن عمر (رض) کی پہلی اور اس روایت میں تعارض ہے پس اس روایت کو محل استدلال میں پیش نہیں کرسکتے۔
جواب نمبر 1: قدبین سے ذکر کیا کہ ابن عمر (رض) کا وہی مطلب ہے جو ہم نے گزشتہ روایت کا بیان کیا جیسا عامر شعبہ (رح) کی روایت بتلا رہی ہے۔ روایت شعبی (رح) ۔