١٦٤٨: محمد بن جعفر بن زبیر عن عروہ عن عائشہ (رض) نقل کیا کہ جناب رسول اللہ (صلی اللہ علیہ وآلہ وسلم) پانچ رکعات کو وتر بناتے اور ان کے درمیان میں نہ بیٹھتے بس آخر میں بیٹھتے۔ زہری کی روایت ہشام اور حجر بن جعفر کی روایت کے مخالف ہے۔ کہ آپ گیارہ رکعت ادا فرماتے اور ان میں سے ایک کے ساتھ وتر بنا لیتے اور ہر دو رکعت پر سلام پھیرتے۔ پس جب عروہ سے وارد روایات مضطرب ہوگئیں کہ جناب رسول اللہ (صلی اللہ علیہ وآلہ وسلم) کے وتروں کی کیفیت کیا تھی اور ان میں سے کسی روایت کو بطور اختیار نہیں کرسکتے تو ہم نے عروہ کے علاوہ روات کی روایات جو انھوں نے امّ المؤمنین (رض) سے کیا ہے ‘ رجوع کیا۔ ملاحظہ فرمائیں۔
تخریج : ابو داؤد فی الصلاۃ باب ٢٦‘ نمبر ١٣٥٩۔
حاصل روایات : ہشام اور محمد بن جعفر کی روایات عروہ سے اور زہری کی روایت عروہ سے مختلف ہوگئیں اس روایت میں گیارہ رکعت پڑھنا اور ایک کو ملا کر وتر بنانا اور ہر دو رکعت پر سلام پھیرنا مذکور ہے اور یہاں پانچ وتروں کو ایک سلام سے پڑھنا مذکور ہے۔
نوٹ : اب عروہ سے منقول روایات میں اضطراب پیدا ہوا تو ان روایات میں وتروں کے ثبوت کے لیے حجت نہ رہی۔
عروہ کے علاوہ دیگر روات کی روایات پر غور کرتے ہیں تاکہ کسی نتیجہ پر پہنچا جاسکے۔