١٦٨١ : ابن لہیعہ نے یزید کی سند سے ابو منصور سے یہ روایت نقل کی ہے۔ ابو یحییٰ کہتے ہیں کہ ایک رات مسور بن مخرمہ اور ابن عباس (رض) رات کی باتوں میں مصروف ہوئے کہ سرخی نکل آئی۔ پھر ابن عباس (رض) سو گئے۔ اہل زوراء کی (اذان کی) آوازوں سے بیدار ہوئے۔ پھر کہنے لگے۔ تمہارا کیا خیال ہے کہ میں تین وتر اور دو رکعت سنت فجر اور نماز صبح پا سکوں گا اس سے پہلے کہ سورج طلوع ہو۔ تو لوگوں نے کہا جی ہاں۔ پس انھوں نے نماز ادا کی اور یہ فجر کی نماز آخری وقت تھا۔ پس یہ بات ناممکن ہوئی کہ ان کے ہاں وتر تین سے کم درست ہوں۔ اور پھر اس دن فجر کا وقت تنگ ہونے کے باوجود تین ہی پڑھیں۔ اس سے یہ دلالت مل گئی کہ جس معنی کی طرف ہم نے احادیث کا معنی لوٹایا ہے وہی صحیح ہے کہ وتر تین ہیں۔