١٧٣٨: عبداللہ بن عبید بن عمیر لیثی نے اپنے والد اور دادا سے روایت کی ہے کہ ایک آدمی نے جناب نبی اکرم (صلی اللہ علیہ وآلہ وسلم) سے سوال کیا کون سی نماز افضل ہے ؟ آپ نے فرمایا طویل قیام والی۔ امام طحاوی (رح) کہتے ہیں میں نے ابن ابی عمران کو کہتے سنا کہ میں نے ابن سماعہ کو کہتے سنا کہ محمد بن الحسن کہا کرتے تھے کہ ہم اسی کو اختیار کرتے ہیں ہمارے ہاں یہ کثرت سجود رکوع سے جس میں قیام طویل نہ ہو افضل ہے جب یہ نوافل کا حکم ہے تو نماز فجر کی سنتیں تو افضل ترین نوافل سے ہیں جن کی اس قدر تاکید ہے جو اور کسی فل نماز کی نہیں ملتی۔ ان میں سے بعض آثار میں سورة کافرون اور اخلاص کا تذکرہ ہے اور بعض میں اس کے علاوہ آیات کا ذکر ہے اور ان میں سورة فاتحہ اور اس کے ساتھ قرآن کا حصہ پڑھنے کی نفی نہیں ہے۔ پس اس بیان سے یہ واضح ہوگیا کہ آپ کی یہ تخفیف ایسی تھی کہ جس ساتھ قراءت تھی اور ہم نے آپ کی قراءت سے فاتحہ کے ساتھ حصہ قرآن کا پڑھنا ثابت کردیا۔ پس اس نے ان لوگوں کا قول خود غلط ہوگیا جو صرف فاتحہ ہی پڑھتے ہیں۔ پس اس سے ثابت ہوا کہ یہ دو رکعت عام نوافل کی طرح ہیں اور ان میں اسی طرح مکمل قراءت ہے جیسا کہ دیگر نوافل میں ہوتی ہے۔ ہمیں کوئی ایسی نفلی نماز نہیں مل سکی کہ جس میں کوئی چیز نہ پڑھی جاتی ہو یا صرف فاتحہ الکتاب پڑھی جاتی ہو۔ البتہ طویل قراءت ان میں کراہت سے خالی نہیں۔ البتہ طویل قیام مستحب ہے اور یہ جناب رسول اللہ (صلی اللہ علیہ وآلہ وسلم) سے مروی ہے۔ ملاحظہ ہو۔