١٧٦ : حضرت ابو امامہ باہلی (رض) حضرت عمرو بن عبسہ (رض) سے روایت کرتے ہیں کہ میں نے عرض کیا یارسول اللہ (صلی اللہ علیہ وآلہ وسلم) وضو کس طرح کیا جائے ؟ آپ (صلی اللہ علیہ وآلہ وسلم) نے فرمایا جب تم وضو کے لیے اپنے ہاتھ تین مرتبہ دھوتے ہو تو تیرے گناہ تیرے پوروں اور انگلیوں کے درمیان سے نکل جائیں گے اور جب تم مضمضمہ کرتے ہو اور ناک میں پانی چڑھاتے ہو اور اپنے چہرے کو دھوتے ہو اور بازؤں کو کہنیوں سمیت دھوتے ہو اور اپنے دونوں پاؤں کو ٹخنوں سمیت دھوؤ گے تو تیری عمومی غلطیاں (صغیرہ گناہ) دھل جائیں گی۔ یہ آثار اس بات کو ثابت کر رہے ہیں کہ پاؤں میں اصل فرض دھونا ہے۔ اگر بالفرض یہ مسح ہوتا تو ان کے دھونے میں ثواب نہ ملتا کیا تم دیکھتے نہیں کہ سر پر مسح فرض ہے اور سر کو دھونے میں کوئی ثواب نہیں ہے۔ اس سے یہ راہنمائی مل گئی کہ پاؤں میں فرض دھونا ہی ہے اور جناب رسول اللہ (صلی اللہ علیہ وآلہ وسلم) سے ایسی روایات وارد ہیں جو اس پر دلالت کرتی ہیں۔ ملاحظہ ہوں۔
تخریج : نسائی باب الطھارۃ باب ١٠٧۔
حاصل روایات : ان تمام روایات میں طریقہ وضو بتلایا گیا اور ان تمام روایات میں پاؤں کے متعلق دھونے ہی کا تذکرہ ہے ۔
دوسرا انداز۔۔۔: علامہ طحاوی (رح) فرماتے ہیں :
ان تمام آثار سے ماسبق روایات سمیت یہ بات ثابت ہوتی ہے کہ دونوں پاؤں میں اصل فرض دھونا ہے کیونکہ اگر اصل فرض مسح ہوتا تو دھونے میں چنداں ثواب نہ ہوتا ذرا توجہ فرمائیں کہ سر میں اصل فرض مسح ہی ہے چنانچہ اس کے دھو لینے میں کوئی ثواب نہیں پس جب ان روایات میں پاؤں کے دھونے میں ثواب بیان کیا گیا تو اس سے بطور دلالت ثابت ہوا کہ قدمین میں فرض ان کا دھونا ہی ہے اور یہ دلالت ہم نے خود تجویز نہیں کی بلکہ احادیث نبویہ علٰی صاحبھا الصلاۃ والسلام سے ثابت ہے چنانچہ احادیث ذیل کا مطالعہ فرمائیں۔