١٧٦٤: کریب مولیٰ ابن عباس (رض) نے بیان کیا کہ ابن عباس ‘ عبدالرحمن بن ازہر ‘ مسور بن مخرمہ (رض) نے مجھے حضرت عائشہ (رض) کی خدمت میں بھیجا کہ ان کو ہمارا سلام عرض کرو اور ان سے عصر کے بعد والی دو رکعتوں کے متعلق دریافت کرو اور ان سے کہو کہ ہمیں اطلاع ملی ہے کہ تم یہ رکعتیں پڑھتی ہو اور ہمیں یہ اطلاع ملی ہے کہ جناب رسول اللہ (صلی اللہ علیہ وآلہ وسلم) نے ان سے منع فرمایا ہے ابن عباس (رض) کہنے لگے میں تو لوگوں کو اس پر عمر (رض) کے ساتھ مل کر مارا کرتا تھا کریب کہتے ہیں میں حضرت عائشہ (رض) کی خدمت میں پہنچا اور میں نے وہ بات ان تک پہنچائی جس کی خاطر انھوں نے مجھے بھیجا تھا تو وہ کہنے لگیں تم امّ سلمہ (رض) سے دریافت کرو چنانچہ میں نکل کر ان کی خدمت میں پہنچا اور ان کو اس بات کی اطلاع دی تو انھوں نے مجھے امّ سلمہ (رض) کی طرف وہ پیغام دے کر بھیجا جو پیغام حضرت عائشہ (رض) کی خدمت میں بھیجتے وقت دیا تھا (میں ان کی خدمت میں پہنچا اور ان کا پیغام دیا) تو امّ سلمہ (رض) فرمانے لگیں میں نے جناب رسول اللہ (صلی اللہ علیہ وآلہ وسلم) سے سنا کہ آپ ان دو رکعتوں سے منع فرماتے تھے پھر میں نے دیکھا کہ آپ نے خود ان کو پڑھا ہے سنو ! جب ان کو پڑھا تو آپ نے عصر کی جماعت کرائی پھر ذرا دیر بعد میرے گھر تشریف لائے اور میرے ہاں قبیلہ انصار بنی حرام کی عورتیں بیٹھی تھیں تو آپ نے یہ دو رکعت ادا فرمائی ہیں میں نے آپ کی طرف لونڈی کو بھیجا اور اسے کہا آپ کے پہلو میں جا کر رک جاؤ اور عرض کرو آپ کی خدمت میں امّ سلمہ (رض) گزارش کرتی ہے یارسول اللہ (صلی اللہ علیہ وآلہ وسلم) میں تو سنتی تھی کہ آپ ان دو رکعتوں سے منع فرماتے ہیں اور اب میں آپ کو دیکھتی رہی ہوں کہ آپ ان کو خود ادا فرما رہے ہیں یہ کیوں ہے ؟ پس اگر آپ دست اقدس سے اشارہ فرما دیں تو پیچھے ہٹ جانا پس لونڈی نے اسی طرح کیا آپ نے اپنے دست مبارک سے اشارہ فرمایا چنانچہ لونڈی پیچھے ہٹ گئی جب آپ نماز مکمل کرچکے تو فرمایا اے ابو امیہ کی بیٹی (یعنی امّ سلمہ) تم نے عصر کے بعد والی دو رکعتوں کے متعلق پوچھا ہے معاملہ یہ ہے کہ میرے پاس قبیلہ عبدالقیس کے لوگ اسلام لانے کے لیے آئے تھے ان کی وجہ سے میں ظہر کے بعد والی دو رکعتوں سے میں مشغول ہو کر ادا نہ کرسکا یہ وہی دونوں رکعات ہیں۔
تخریج : بخاری فی السہو باب ٨‘ مسلم فی المسافرین روایت نمبر ٢٩٧۔
حاصل روایات : ان روایات پر نظر ڈالنے سے معلوم ہوتا ہے کہ عصر کے بعد دو رکعت والا واقعہ حضرت عائشہ (رض) کے ساتھ پیش نہیں آیا بلکہ امّ سلمہ (رض) کے ساتھ پیش آیا اور خود حضرت عائشہ (رض) کی روایت سے بھی صاف ظاہر ہوتا ہے کہ عصر کے بعد دو رکعت جناب رسول اللہ (صلی اللہ علیہ وآلہ وسلم) ان کے ہاں ادا نہیں فرمائیں اور اس کے متعلق استفسار کو امّ سلمہ (رض) کی طرف پھیر رہی ہیں امّ سلمہ (رض) صاف ممانعت کر رہی ہیں۔ اس سے صاف واضح ہوا کہ حضرت عائشہ (رض) سے متعلق فصل اول کی تمام روایات منسوخ ہیں اور ان روایات کے ہوتے ہوئے ساقط الاعتبار ہیں پس ان روایات سے عصر کے بعد کی دو رکعت پر استدلال درست نہیں نیز ابن عباس ‘ مسور بن مخرمہ اور عبدالرحمن بن زبیر (رض) کی بلاغیات فصل دوم کی روایات کی تائید کر رہی ہیں اور ان تمام صحابہ وتابعین کی تائید بھی فصل اول کی روایات کی تائید نہیں کرتیں۔
جواب نمبر 1: زید بن خالد جہنی (رض) کی روایت کا جواب یہ ہے کہ سنت کی قضا جناب رسول اللہ (صلی اللہ علیہ وآلہ وسلم) کی خصوصیات سے ہے پس اس سے سنت کی قضاء پر استدلال بھی درست نہیں۔
جواب نمبر 2: حضرت عائشہ (رض) کی روایات میں آپ کے عمل کا تذکرہ ہے جس میں خصوصیت کا قوی احتمال ہے نیز جب اس کے مقابلے میں ممانعت تصریح سے ثابت ہوگئی اور ان دو روایات کی تاویل بھی تصریح سے سامنے آگئی تو فریق اوّل کی پیش کردہ روایات پر عمل کی گنجائش نہ رہی واللہ اعلم۔ ان جوابات والی روایات کے بعد اب ہم فریق ثانی کے مثبت دلائل پیش کرتے ہیں۔