١٧٩٦: ابن عون کہتے ہیں کہ میں اور شعیب بن حبحاب ابراہیم کے پاس تھے نماز عصر کا وقت ہوا تو ابراہیم نے ہمیں جماعت کرائی ہم ان کے پیچھے کھڑے ہوئے تو انھوں نے ہمیں اپنے دائیں بائیں کردیا جب ہم نماز پڑھ چکے اور گھر کی طرف نکلنے لگے تو ابراہیم کہنے لگے ابن مسعود (رض) نے اسی طرح نماز پڑھنے کا حکم فرمایا اور فرمایا فلاں کی طرح مت پڑھو۔ ابوالبشرالبرقی کہتے ہیں کہ یہ بات میں نے ابن سیرین کو کہی اور میں نے ابراہیم کا نام نہ لیا تو ابن سیرین کہنے لگے یہ بات ابراہیم نے علقمہ سے نقل کی ہے اور میرے خیال میں ابن مسعود (رض) نے یہ جگہ کی تنگی کی وجہ سے کیا ہے یا اور کسی عذر کی وجہ سے کیا جو ان کے سامنے تھے اس وجہ سے نہیں کہ یہ سنت طریقہ ہے گویا یہ روایت خاص علت سے معلول ہے۔ اور میں نے شعبی کے سامنے تذکرہ کیا تو انھوں نے کہا کہ یہ علقمہ بن عون کا زعم ہے۔
حاصل روایات : اس روایت میں ابن مسعود (رض) کی طرف اس کی نسبت کرنے میں شعبی اور ابن سیرین نے علقمہ عن النبی (صلی اللہ علیہ وآلہ وسلم) کے الفاظ ذکر نہیں کئے اور یہ بھی ہوسکتا ہے کہ علقمہ نے اسے شعبی اور ابن سیرین کے سامنے ذکر نہ کیا ہو کہ ابن مسعود (رض) نے اس کو نبی اکرم (صلی اللہ علیہ وآلہ وسلم) سے بیان کیا ہو پھر اس کو اسود نے اپنے بیٹے کے سامنے بیان کردیا ہو ابن سیرین اور عامر شعبی اس روایت کو مرفوع نہیں مانتے بلکہ یہ منقطع ہونے کی وجہ سے مرفوع روایات کی کیسے مقابل ہوسکتی ہے۔
فریق ثانی کا مؤقف اور سابقہ دلائل کا معارضہ :
دو آدمی ہوں تو امام آگے کھڑا ہوگا یہی مسنون طریقہ ہے۔ یہ روایات اس کی تائید کرتی ہیں۔