١٨٢٠: نافع نے ابن عمر (رض) سے بیان کیا کہ جب ان سے صلوۃ خوف کے متعلق دریافت کیا جاتا تو فرماتے امام اور ایک گروہ نماز شروع کرے امام ان کو ایک رکعت پڑھائے اور ایک جماعت ان کے اور دشمنوں کے درمیان حائل رہے اور نماز میں شامل نہ ہو پھر وہ لوگ آگے آئیں جنہوں نے ابھی ایک رکعت بھی ادا نہیں کی اور پہلی جماعت پیچھے ہٹ جائے ان کو امام ایک رکعت پڑھائے پھر امام لوٹ جائے کیونکہ وہ دو رکعت پوری کرچکا پھر ہر طائفہ اپنی اپنی ایک ایک رکعت ادا کرلیں اس کے بعد کہ امام نماز سے فارغ ہوچکا پس اس طرح ہر گروہ دو دو رکعت ادا کرنے والا بن جائے گا۔ نافع (رح) کہتے ہیں کہ میرے خیال میں ابن عمر (رض) یہ بات جناب نبی اکرم (صلی اللہ علیہ وآلہ وسلم) سے ہی نقل کر کے بتلاتے تھے۔ پس اس روایت میں یہ خبر دی کہ دوسرا گروہ نماز میں اس وقت شامل ہو جبکہ امام ایک جماعت کو ایک رکعت پڑھا لے اور قرآن مجید کی آیت بھی اسی کی شہادت دیتی ہے۔ چنانچہ فرمایا : { ولتات طائفۃ اخری لم یصلوا فلیصلوا معک } (القرآن) ۔ ” اور دوسرے گروہ کو آنا چاہیے جنہوں نے نماز نہیں پڑھی ‘ پس وہ آپ کے ساتھ نماز ادا کریں “۔ اس بیان سے یہ بات روز روشن کی طرح ثابت ہوگئی کہ دوسری جماعت اس وقت نماز میں شامل ہوگی جب امام رکعت اوّل سے فارغ ہوچکے گا۔ یہ روایت صحیح ہے اور اصل کے لحاظ سے مرفوع ہے۔ اگرچہ نافع سے مالک سے بیان کرتے ہوئے اس کے رفع میں شک کیا مگر ان کے اکابر شاگردوں نے ان سے مرفوع نقل کی ہے۔
تخریج : بخاری فی تفسیر سورة ٢‘ باب ٤٤‘ مسلم فی المسافرین نمبر ٣٠٦‘ ابو داؤد فی الصلاۃ نمبر ١٢٤٣‘ نسائی فی السنن کتاب صلوۃ الخوف نمبر ١٩٣٠‘ ابن ماجہ فی الاقامہ باب ١٥١‘ نمبر ١٢٥٨۔
امام نافع (رح) فرماتے ہیں کہ حضرت ابن عمر (رض) نے یہ بات اپنی طرف سے نہیں بلکہ جناب نبی اکرم (صلی اللہ علیہ وآلہ وسلم) سے سن کر فرمائی ہے۔
حاصل روایات : اس روایت نے ثابت کردیا کہ دوسرے گروہ نے شروع میں امام کے ساتھ شرکت نہیں کی بلکہ پہلے گروہ کے امام کے ساتھ ایک رکعت پڑھ لینے کے بعد شرکت کی ہے پس یہ روایت کا حصہ اگر روات کا تصرف نہ ہو تو دوسری صحیح روایات کے خلاف ہونے کی وجہ سے قابل استدلال نہیں۔
الجواب نمبر ": قرآن مجید میں اللہ تعالیٰ نے فرمایا ولتأت طائفۃ اخرٰی لم یصلوا فلیصلوا معک۔ (النسائ) نص کے الفاظ لم یصلوا معک شروع میں امام کے ساتھ ان کی شرکت کی صاف نفی کر رہے ہیں وہ ٹکڑا نظم قرآن کے مخالف ہونے کی وجہ سے قابل استدلال نہیں بلکہ تصرف روات شمار ہوگا ابن مسعود (رض) کی طرف اس کی نسبت درست نہ ہوگی۔
تصرف روات کی کھلی دلیل :
الجواب نمبر 2: ابن مسعود (رض) کے علاوہ صحابہ کرام (رض) اس جملے کو نقل نہیں کرتے۔ ملاحظہ ہو۔