١٨٢٩: عروہ بن زبیر نے ابوہریرہ (رض) سے نقل کیا کہ جناب رسول اللہ (صلی اللہ علیہ وآلہ وسلم) نے نماز خوف پڑھائی اور لشکر کی دو جماعتیں بنائیں پس ایک جماعت نے جناب رسول اللہ (صلی اللہ علیہ وآلہ وسلم) کے ساتھ ایک رکعت نماز ادا کی پھر یہ جماعت آپ کے ساتھ جب دوسری رکعت کے قیام کے لیے اٹھ گئے تو یہ پیچھے کی طرف الٹے قدموں ہٹ گئے اور ان لوگوں کی جگہ لے لی جو دشمن کے سامنے تھے اور دوسری جماعت ان کی جگہ آئی اور انھوں نے ایک رکعت اپنی ادا کی اس حال میں کہ جناب رسول اللہ (صلی اللہ علیہ وآلہ وسلم) قیام کی حالت میں تھے پھر یہ جماعت دوسری رکعت کے لیے گھڑے ہوئے پس آپ نے ان کو دوسری رکعت پڑھائی پس ان کی اور جناب رسول اللہ (صلی اللہ علیہ وآلہ وسلم) کی دو رکعت ہوگئیں اور وہ لوگ بھی آئے جو دشمن کے بالمقابل تھے پس انھوں نے اپنی ایک رکعت دو سجدوں سمیت مکمل کی پھر یہ تشہد میں بیٹھ گئے پس آپ نے سب کے ساتھ سلام پھیرا۔ اس روایت میں امام کا پہلی رکعت ادا کرنے والی جماعت کے ساتھ دشمن کی طرف پھرجانا مذکور ہے یہ صرف اسی روایت میں مذکور ہے اور کسی روایت میں وارد نہیں اور قرآن مجید کی آیت بھی غلط ہونے پر دلالت کرتی ہے چنانچہ فرمایا : { فلتقم طائفۃ منھم معک ولیاخذوا اسلحتھم فاذا سجدوا فلیکونوا من ورائکم واتأت طائفۃ اخری لم یصلوا فلیصلوا معک } (القرآن) ۔ ” پس ایک جماعت آپ کے ساتھ نماز میں کھڑی ہو اور وہ اپنا اسلحہ بھی لیے رہیں ‘ پس جب وہ رکعت مکمل کرلیں تو وہ پیچھے چلے جائیں اور دوسری جماعت آجائے جنہوں نے نماز نہیں پڑھی ‘ پس وہ آپکے ساتھ نماز پڑھیں “۔ اس آیت میں دو ایسی باتیں ہیں جو اس روایت کو ردّ کر رہی ہیں۔ (١) لم یصلوا فلیصلوا معک ‘ اس سے یہ دلالت مل رہی ہے کہ ان کا نماز میں داخلہ اسی وقت ہے جب وہ آئے ہں اس سے پہلے نہیں۔ (٢) فلتقم طائفۃ منھم معک ‘ تو دونوں گروہوں کا امام کی طرف آنا ثابت ہو رہا ہے اور یہ چیز جناب رسول اللہ (صلی اللہ علیہ وآلہ وسلم) سے وارد متواتر آثار کے موافق ہے جن میں آپ کا فعل مذکور ہے۔ شروع باب میں بیان کرچکے وہ اس حدیث سے ہر اعتبار سے اولیٰ ہیں۔ دوسرے علماء نے نماز خوف میں ایک اور راہ اپنائی ہے۔ مستدل روایات ملاحظہ ہوں۔
تخریج : ابو داؤد فی الصلاۃ نمبر ١٢١٤۔
نقد و تبصرہ طحاوی (رح) : اس روایت میں دوسرے گروہ کا بھی محاذ کو چھوڑ کر آجانا مذکور ہے دیگر روایات اس حصہ کی مؤید نہیں اور قرآن مجید میں جو طریقہ مذکور ہے اس کے خلاف ہے پس یہ حصہ محل استدلال نہیں تصرف راوی ہے۔
حاصل روایات : اس روایت سے یہ بات تو ثابت ہوگئی کہ امام سے پہلے کوئی گروہ بھی نماز مکمل نہیں کرے گا بلکہ امام کے بعد مکمل کریں گے البتہ نماز میں تمام کا شروع میں داخل ہونا بھی ثابت ہو رہا ہے یہ بھی روایات مشہورہ کے خلاف ہے نیز قرآن مجید کے اندر مذکورہ صورت کے بھی خلاف قرآن مجید میں فلتقم طائفۃ منہم معک (النساء ١٠٢) اس سے معلوم ہوتا ہے کہ نماز کے لیے ایک جماعت ہے جو آپ کے ساتھ کھڑی۔ دوسری جماعت نماز شروع کرنے والی نہیں ہے نیز آیت کے الفاظ لم یصلوا فلیصلوا معک (النسائ) بتلاتے ہیں کہ یہ نماز میں پہلے شامل نہیں ورنہ ان کو لم یصلوا نہ کہا جاتا کیونکہ تحریمہ میں شریک ہونے والا تو نماز میں شامل ہوجاتا ہے پس معلوم ہوا کہ دوسرا گروہ نماز میں آ کر شریک ہوا ہے پہلے وہ داخل نہ تھا اور پھر ولتأت طائفۃ اخری لم یصلوا فلیصلوا معک تو اس آیت میں دونوں جماعتوں کا یکے بعد دیگرے آنا مذکور ہے پس اس صورت کے ساتھ یہ روایت آثار عامہ کے ساتھ مل جائے گی۔
فریق ثالث کا جواب :
اس روایت اور سیاق آیت سے ان کا جواب بھی ہوگیا جو امام سے پہلے دوسری رکعت کو مکمل کرنے کے قائل ہیں فریق ثانی کا مؤقف جو مبرہن ہوگیا۔

فریق رابع کا مؤقف اور استدلال :
امام حسن بصری (رح) کہتے ہیں صلوۃ خوف امام کے لیے چار رکعت اور مقتدیوں کے لیے دو دو رکعت ہے دلیل یہ روایت ابو بکرہ و جابر (رض) ہے۔