١٨٧٣: ابن عمرو نے عروہ سے اور انھوں نے جناب نبی کریم (صلی اللہ علیہ وآلہ وسلم) سے اسی طرح کی روایت نقل کی ہے البتہ اس میں یہ مذکور نہیں کہ دوسرا رکوع پہلے رکوع سے کم تھا لیکن باقی روایت اسی طرح ہے اور یہ اضافہ ہے کہ یہ گہن اس دن ہوا جس دن ابراہیم سلام اللہ علیہ نے وفات پائی۔ امام طحاوی (رح) فرماتے ہیں بعض علماء نے یہ مؤقف اختیار کیا کہ نماز کسوف میں چار رکوع اور چار سجدے ہیں ‘ مگر دیگر علماء نے ان سے اختلاف کرتے ہوئے کہا کہ یہ آٹھ رکوع اور چار سجدے ہیں۔ انھوں نے اس سلسلہ میں اس طرح استدلال کیا ہے۔
تخریج : بخاری فی الکسوف باب نمبر ١۔
حاصل آثار و روایات :
ان روایات سے معلوم ہوتا ہے کہ گہن کی نماز میں ہر رکعت میں دو رکوع ہوں گے گویا کل چار رکوع اور چار سجدے ہوں گے۔
فریق ثانی کا مؤقف : ہر رکعت میں چار رکوع اور دو سجدے ہیں کل آٹھ رکوع اور چار سجدے ہوں گے یہ دو روایات ابن عباس اور علی (رض) سے ثابت ہے۔