١٩٢٨: ابو معشر نے نقل کیا کہ ابراہیم نخعی کہنے لگے دن رات کی نماز دو دو ہے البتہ دن میں چار رکعات سلام کے فاصلہ کے بغیر پڑھو۔ امام طحاوی (رح) کہتے ہیں کہ دن کی نماز کا حکم اسی طرح ثابت ہوگیا جس طرح ہم نے ذکر کیا اور جو کچھ ہم نے ان روایات میں ذکر کیا ہے وہ اس کے منافی نہیں اور نہ اس کے مخالف ہے اور رات کی نماز کے سلسلہ کا اختلاف تو ہم اس باب کے شروع میں ذکر کرچکے۔ پس وہ حضرات جو رات کو ایک سلام کے ساتھ آٹھ رکعات کے قائل ہیں تو ان کی دلیل جناب رسول اللہ (صلی اللہ علیہ وآلہ وسلم) کی یہ روایت ہے کہ آپ رات کو گیارہ رکعت ادا کرتے جن میں سے تین رکعت وتر ہوتے۔ ان حضرات کے جواب میں کہا جائے کہ امام زہری نے حضرت عائشہ صدیقہ (رض) سے روایت کیا ہے کہ جناب نبی اکرم (صلی اللہ علیہ وآلہ وسلم) ان میں سے ہر دو رکعت کے بعد سلام پھیرتے تھے اور یہ مسئلہ توفیقی ہے جس طرح سنا ہے اسی طرح آپ کے فعل اور صحابہ کرام کے فعل پر عمل پیرا ہونا ہے۔ ہمیں آپ (صلی اللہ علیہ وآلہ وسلم) کا کوئی ایسا فعل و قول نہیں ملا جس میں دو رکعت سے زائد نماز کو ادا کیا ہو۔ ہم اسی کو اختیار کرنے والے ہیں اور ہمارے ہاں دونوں اقوال میں سے زیادہ صحیح قول یہی ہے۔
حاصل روایات : ان روایات سے ثابت ہوگیا کہ دن کی نماز چار چار درست ہے ان روایات کے معارض کوئی روایت نہی اور رات کی نماز دو دو ثابت ہوگئی اس میں اختلافی روایات پہلے بھی ذکر کی ہیں۔
فریق ثالث : البتہ جو لوگ رات کو دو سے آٹھ تک ایک سلام سے درست کہتے ہیں ان کی دلیل یہ روایت ہے کہ جناب رسول اللہ (صلی اللہ علیہ وآلہ وسلم) رات کو گیارہ رکعت ادا فرماتے ان میں تین وتر بھی تھے اس سے ثابت ہوا کہ آٹھ رکعت ایک سلام سے درست ہیں۔
الجواب نمبر 1: حضرت عائشہ (رض) سے روایت موجود ہے کہ (آپ رات کی نماز میں) ہر دو پر سلام پھیرتے تھے۔
جواب نمبر 2: اس باب میں توقیف پر دارومدار ہے اسی طرح آپ کا فعل اور آپ کے صحابہ کرام (رض) کا فعل۔ ہمیں تو آپ کے اقوال و افعال میں رات کے اعمال میں کوئی روایت نہیں مل سکی جس میں دو رکعت سے زیادہ ایک تکبیر سے ادا کی گئی ہوں پس رات کو دو دو رکعت والا قول ہی ہر دو اقوال میں زیادہ صحیح اور راجح ہے۔
باقی تمام نوافل و سنن کا حکم ایک ہے کہ اصل کے اعتبار سے وہ سب نوافل ہیں۔
نوٹ : اس باب میں نظری دلیل پیش نہیں کی گئی کیونکہ نوافل کی تعداد کے معاملے کو توقیفی قرار دیا پس اس میں عقل و قیاس کا دخل نہیں۔ امام طحاوی (رح) نے رات میں دو دو رکعت والے قول کو سب سے زیادہ اصح قرار دیا ہے اور اسی کو دلائل روایات و آثار سے مزین کیا ہے۔
` بَابُ التَّطَوُّعِ بَعْدَ الْجُمُعَۃِ کَیْفَ ہُوَ ؟`
جمعہ کے بعد نوافل کی تعداد کتنی ہے ؟
نمبر 1: جمعہ کے بعد نوافل یعنی سنن کی تعداد کتنی ہے امام ابوحنیفہ اور محمد ‘ احمد (رح) جمعہ کے بعد چار رکعت مسنون کہتے ہیں۔
نمبر 2: امام مالک و زہری جمعہ کے بعد دو رکعت مسنون کہتے ہیں۔
نمبر 3: امام ابو یوسف ‘ شافعی ‘ طحاوی (رح) جمعہ کے بعد چھ رکعت مسنون کہتے ہیں۔
فریق اوّل کا مؤقف اور دلیل : جمعہ کے بعد چار رکعت مسنون ہیں جیسا روایت ابوہریرہ (رض) میں ہے۔ ملاحظہ ہو۔