١٩٤٨: ابو سلمہ بن عبدالرحمن نے حضرت عائشہ (رض) سے ‘ انھوں نے رسول اللہ (صلی اللہ علیہ وآلہ وسلم) اسی طرح روایت نقل کی ہے۔ اس روایت میں عبداللہ بن شقیق والی روایت سے ذرا سا فرق ہے کہ بیٹھ کر نماز شروع کی ہوتی تو کھڑے ہو کر پھر رکوع میں جاتے۔ اس روایت میں عبداللہ بن شقیق کی روایت سے مختلف بات ہے کیونکہ اس روایت میں مذکور ہے کہ آپ کھڑے ہو کر رکوع کرتے جبکہ نماز آپ نے بیٹھ کر شروع فرمائی ہوتی اور یہ روایت ابن شقیق کی روایت سے اولیٰ ہے کیونکہ اس میں مذکور ہے ” آپ بیٹھے رہتے یہاں تک کہ بیٹھ کر رکوع کرتے “۔ یہ روایت اس بات پر دلالت نہیں کرتی کہ آپ کے لیے کھڑے ہو کر رکوع میں جانا مناسب نہیں اور آپ کا بیٹھ کر اٹھنا تاکہ کھڑے ہو کر پھر رکوع میں جائیں۔ یہ اس بات پر دلالت کرتا ہے کہ اس کے لیے جائز ہے کہ جب اس نے بیٹھ کر نماز شروع کی ہے تو وہ کھڑے ہو کر رکوع کرلے۔ اسی وجہ سے اس روایت کو پہلی سے اولیٰ قرار دیا۔ یہ امام ابوحنیفہ ‘ ابویوسف اور محمد (رح) کا قول ہے۔
تخریج : ١؍١٥٠ بخاری ‘ مسلم ١؍٢٥٢‘ ابو داؤد ١؍١٣٧۔
یہ روایت پہلی سے بہتر ہے کیونکہ اس میں بیٹھ کر نماز شروع کرنے اور رکوع سے پہلے اٹھ جانے کا صاف تذکرہ ہے کیونکہ زیادہ دیر بیٹھنا کھڑے ہو کر رکوع کرنے پر دلالت نہیں کرتا۔
حاصل روایات : یہ ہیں کہ بیٹھ کر نماز شروع کی جائے پھر رکوع سے پہلے اٹھ جائیں اور رکوع کریں اس میں قطعاً کوئی حرج نہیں۔ تطبیق کی شاندار صورت جو بعض علماء نے پیش کی ہے۔
نمبر 1: جوانی اور کامل صحت کی حالت میں ھڑے ہو کر نماز پڑھتے اور اسی حالت میں رکوع کرتے۔
نمبر 2: بیماری کی حالت میں بیٹھ کر نماز شروع کرتے اور رکوع سے پہلے اٹھ کر رکوع فرما لیتے۔
نمبر 3: عمر کے آخری حصہ میں بیٹھ کر نماز شروع فرماتے اور اسی طرح تکمیل فرماتے گویا یہ سب روایات اپنے اپنے مقام پر آپ کی زندگی کے ان گوسوں کو اجاگر کر رہی ہیں۔ واللہ اعلم۔
ہمارے ائمہ ثلاثہ ابوحنیفہ ‘ ابو یوسف ‘ محمد (رح) بیٹھ کر نماز شروع کر کے پھر رکوع سے پہلے اٹھ جاتے اور رکوع کرنے میں کوئی حرج قرار نہیں دیتے۔
نوٹ : اس باب میں بھی نظر کی ضرورت نہیں سمجھی گئی کیونکہ مقصود پر دلالت کی روایات بالکل واضح تر ہیں امام طحاوی (رح) کا رجحان بھی دوسرے قول کی طرف ہے اسی وجہ سے عبداللہ بن شقیق کی روایت پر ابو سلمہ کی روایت کو ترجیح دے رہے ہیں۔