١٩٥٥: سدی نے عبد خیر سے نقل کیا کہ جناب حضرت علی (رض) گھر سے مسجد میں تشریف لائے جبکہ ہم مسجد میں تھے آپ نے فرمایا وتروں کے متعلق سوال کرنے والا کہاں ہے ؟ ہم ان کو لے کر اس کے پاس پہنچے تو آپ نے فرمایا جناب رسول اللہ (صلی اللہ علیہ وآلہ وسلم) شروع رات میں وتر ادا فرما لیتے پھر اگر آپ نفل پڑھتے تو دوبارہ وتر پڑھ لیتے پھر یہ وتر آپ کے قائم رہتے (یعنی اس کے بعد کوئی نماز نہ پڑھتے) اور یہ بالکل فجر کے طلوع کے قریب کرتے۔ یہ ہمارے نزدیک طلوع فجر کیھ قریب ہونے پر محمول ہے۔ اس سے پہلے کہ وہ طلوع ہو تاکہ اس روایت کا معنی اور عاصم بن ضمرہ کی روایت کا معنی مختلف نہ ہو۔ امام طحاوی (رح) فرماتے ہیں کہ کچھ علماء اس طرف گئے ہیں کہ وتروں کا اصل وقت مناسب یہ ہے کہ سحری کا وہ وقت ہو کہ جس کے بعد نفل نہیں پڑھے جاسکتے اور جس نے اس کے بعد نفل پڑھے اس نے ان وتروں کو باطل کردیا۔ اسے دوبارہ وتر پڑھنے ضروری ہیں۔ انھوں نے جناب رسول اللہ (صلی اللہ علیہ وآلہ وسلم) کی اس عمل کو دلیل بنایا کہ آپ وتروں کو رات کے آخری حصے تک مؤخر فرماتے تھے اور دوسری دلیل یہ ہے کہ آپ کے بعد صحابہ کرام (رض) کا خیال یہ تھا کہ جس نے وتروں کے بعد نفل پڑھے انھوں نے وتروں کو باطل کردیا اور انھوں نے ان روایات کو دلیل میں پیش کیا۔
یہاں عند طلوع الفجر سے قرب طلوع فجر مراد ہے تاکہ اس حدیث اور سابقہ روایت کا معنی مختلف نہ رہے۔
تخریج : مسند احمد ١؍١٢٠۔
حاصل روایات : ان دونوں روایتوں سے وتر کا آخر میں پڑھنا ثابت اگر وقت ہوتا تو آپ نوافل ادا فرماتے اور سابقہ وتروں سے ایک رکعت ملا کر جفت بناتے پھر وتر دوبارہ پڑھتے اس سے معلوم ہوا کہ وتروں کے بعد طلوع فجر تک کوئی نفل نماز نہ پڑھے ورنہ باطل ہوجائیں گے دوبارہ پڑھنے ہوں گے اس مفہوم کو مزید تائید ان فتاویٰ جات صحابہ (رض) سے ہوتی ہے۔