١٩٧٣: ابن شہاب نے ابن المسیّب سے بیان کیا کہ ابوبکر و عمر (رض) دونوں نے وتر کے متعلق جناب رسول اللہ (صلی اللہ علیہ وآلہ وسلم) کی خدمت میں مذاکرہ کیا تو ابوبکر (رض) کہنے لگے میں نماز (عشائ) پڑھتا ہوں پھر وتر پڑھ کر سو رہتا ہوں پھر جب میں بیدار ہوتا ہوں تو صبح تک دو دو رکعت پڑھتا رہتا ہوں عمر (رض) کہنے لگے میں تو شفع پڑھ کر سو جاتا ہوں اور سو کر آخر میں وتر پڑھتا ہوں اس پر جناب رسول اللہ (صلی اللہ علیہ وآلہ وسلم) نے فرمایا ابوبکر (رض) تم نے احتیاط برتی اور عمر (رض) تم نے مضبوط چیز کو پا لیا۔ پس جناب رسول اللہ (صلی اللہ علیہ وآلہ وسلم) کا ارشاد ” لا وتران فی لیلۃ “ کہ ایک رات میں وتر دو مرتبہ نہیں ‘ یہ وتروں کے اعادہ کی نفی کرتا ہے اور قول ابوبکر (رض) بھی اس کی موافقت کررہا ہے۔ کہ میں رات کے شروع میں وتر پڑھ لیتا ہوں پھر جب بیدار ہوجاتا ہوں تو صبح تک دو دو رکعت کر کے پڑھتا رہتا ہوں اور جناب رسول اللہ (صلی اللہ علیہ وآلہ وسلم) کا ان کو انکار نہ کرنا اس بات کی دلیل ہے کہ ان کا حکم اسی طرح ہے جیسے ابوبکر (رض) کرتے تھے اور ان کے بعد نوافل کا پڑھنا وتروں کو باطل نہیں کرتا۔ صحابہ کرام (رض) کی ایک جماعت سے یہ بات مروی ہے۔ روایات ملاحظہ ہوں۔
تخریج : مثلۃ فی ابن ابی شیبہ ٢؍٨٠‘ ابی داؤد ١؍٢٠٣۔
حاصل روایات : امام طحاوی (رح) کہتے ہیں جناب رسول اللہ (صلی اللہ علیہ وآلہ وسلم) کے ارشاد سے لاوتران فی لیلۃ سے یہ بات ثابت ہوئی کہ وتروں کو دوبارہ نہیں پڑھا جاسکتا اور یہ باب ابوبکر (رض) کے قول کے موافق ہے کہ شروع رات میں وتر پڑھتا ہوں پھر جب بیدار ہوتا ہوں تو صبح تک دو دو رکعت پڑھتا رہتا ہوں جناب رسول اللہ (صلی اللہ علیہ وآلہ وسلم) کا اس پر انکار نہ فرمانا اس بات کی دلیل ہے کہ وتروں کا حکم وہی ہے جو ابوبکر (رض) کرتے تھے اور بات بھی واضح ہوگئی کہ وتروں کو بعد والے نوافل وتروں کو باطل نہیں کرتے۔