١٩٩٦: صلہ بن زفر نے حضرت حذیفہ بن یمان (رض) سے نقل کیا کہ میں نے جناب رسول اللہ (صلی اللہ علیہ وآلہ وسلم) کے پہلو میں ایک رات نماز ادا کی پس آپ نے سورة بقرہ شروع فرمائی جب اس سے فارغ ہوئے تو آل عمران شروع کردی جب آپ ایک آیت کو پڑھتے جس میں جنت و نار کا ذکر ہوتا تو رک کر جنت مانگتے یا آگ سے پناہ طلب کرتے یا اس سے ملتی جلتی بات حذیفہ (رض) نے کہی۔ ان روایات سے معلوم ہو رہا ہے کہ جناب رسول اللہ (صلی اللہ علیہ وآلہ وسلم) ہر رکعت میں دو سورتیں ملاتے تھے اور یہ اگرچہ ابوالعالیہ والی روایت کے خلاف ہے مگر یہ سند کی پختگی اور صحت میں اس سے اولیٰ ہے۔ پھر حضرت ابن مسعود (رض) کا یہ کہنا کہ ان کو مفصل کہنے کی وجہ یہ ہے کہ تم ان کو الگ الگ کر کے پڑھو یہ بات انھوں نے جناب رسول اللہ (صلی اللہ علیہ وآلہ وسلم) سے مرفوع نقل نہیں کی ‘ ممکن ہے ان کا اجتہاد ہو اور اگر یہ اجتہاد ہے تو اس سلسلہ میں حضرت عثمان (رض) کا اجتہاد ان کے خلاف ہے کیونکہ وہ تو ایک رکعت میں پورا قرآن مجید پڑھتے تھے۔ ہم اس کو اس باب کے آخر میں انشاء اللہ ذکر کریں گے اور جناب رسول اللہ (صلی اللہ علیہ وآلہ وسلم) سے یہ بھی وارد ہے کہ آپ نے ایک رکعت صبح میں ایک سورت کا کچھ حصہ پڑھا۔
تخریج : نسائی ١؍١٥٦‘ ابو داؤد ١؍١٢٧‘ ابن ماجہ ١؍٩٦‘ ترمذی ١؍٦٠۔
حاصل روایات : ان روایات سے ثابت ہوتا ہے کہ ایک رکعت میں دو سورتوں کا پڑھنا درست ہے اس میں کچھ کراہت نہیں۔
امام طحاوی (رح) کہتے ہیں کہ ابوالعالیہ والی روایت اس کے خلاف ہے اگر اس کو اولویت پر محمول کریں تو موافقت ہوجائے گی۔ (ورنہ وہ منقطع روایت ہے اور یہ سب مرفوع روایات ہیں)
ضمنی سوال : ابن مسعود (رض) مفصل کی وجہ لتفصلوہ سے ذکر کی ہے تاکہ اس کو تم جدا جدا کر کے پڑھو۔
الجواب نمبر 1: ابن مسعود (رض) نے یہ نبی اکرم (صلی اللہ علیہ وآلہ وسلم) کا قول ذکر نہیں فرمایا۔
نمبر 2: اگر روایت کا بعد والا حصہ سامنے رکھا جائے تو لتفصلوا کا معنی ترتیل کرنا ہوگا اور ہر ایک رکعت میں ایک سورة پڑھنا مراد نہ ہوگا کیونکہ وہ مثال دے کر پھر دو سورتوں کا ایک رکعت میں جمع کرنا ثابت کر رہے ہیں اور اس معنی سے ابن مسعود (رض) پر کوئی اعتراض نہیں عثمان (رض) کا عمل بھی اس کا مؤید ہے کہ وہ ایک رات میں قرآن مجید پڑھتے۔