٢١٠٤: جابر بن یزید بن اسود اسوائی نے اپنے والد یزید بن اسود (رض) سے نقل کیا کہ ہمیں رسول اللہ (صلی اللہ علیہ وآلہ وسلم) نے مسجد خیف میں صبح کی نماز پڑھائی جب نماز سے فراغت ہوئی تو اچانک دو آدمیوں پر نگاہ پڑی جو مسجد کے پچھلے حصے میں بیٹھے تھے ان کو لایا گیا تو ان پر کپکپی طاری تھی آپ نے فرمایا تم نے سہارے ساتھ نماز کیوں نہیں پڑھی دونوں نے عرض کی یارسول اللہ (صلی اللہ علیہ وآلہ وسلم) ! ہم نے اپنے کجاو وں کے پاس نماز پڑھ لی آپ نے فرمایا ایسا مت کرو جب تم اپنے گھروں میں نماز پڑھ لو پھر تم لوگوں میں ایسی حالت میں آؤ کہ وہ نماز میں مصروف ہوں تو ان کے ساتھ نماز پڑھ لو یہ تمہاری نفل نماز بن جائے گی آپ نے نافلہ یا تطوع کا لفظ فرمایا دونوں کا معنی ایک ہے۔ امام طحاوی (رح) فرماتے ہیں کہ بعض علماء نے ان آثار کو سامنے رکھتے ہوئے کہا کہ جب کوئی شخص اپنے گھر میں نماز پڑھ لے خواہ وہ کوئی سی نماز ہو مگر دوسرے علماء کی جماعت نے فرمایا کہ جس نماز کے بعد نوافل کی اجازت ہے۔ اس میں ان آثار پر عمل میں کچھ حرج نہیں کہ امام کے ساتھ نماز ادا کرلے تاکہ وہ اس کے لیے نفل بن جائیں۔ مگر مغرب میں ایسا نہ کرے کیونکہ اس کو لوٹانا مکروہ ہے اگر وہ اسے لوٹائے گا تو وہ نفل ہیں اور نفل شفعہ شفعہ ہیں طاق نہیں ہوتے اور جن نمازوں کے بعد نوافل کی اجازت نہیں ان میں امام کے ساتھ اعادہ نماز نہ کرے۔ اس لیے کہ یہ ایسے وقت کے نفل ہیں جس میں نوافل کی اجازت نہیں۔ انھوں نے اس سلسلہ میں تواتر کے ساتھ مروی ان روایات سے استدلال کیا ہے۔ جن میں آپ صبح سے لے کر طلوع آفتاب تک اور عصر سے لے کر غروب آفتاب میں نفل کی ممانعت فرمائی ہے۔ یہاں تک کہ طلوع اور غروب پورے طور پر ہوجائے۔ ہم اسناد سے ان روایات کو اسی کتاب میں ذکر کرچکے۔ تو دوسرے قول والوں کے ہاں یہ روایات فصل اوّل میں مذکورہ روایات کی ناسخ ہیں۔ وہ فرماتے ہیں کہ جب شروع باب کی بعض احادیث میں یہ موجود ہے ” فصلوھا فانھا لکم نافلۃ او قال تطوع “ کہ ان کو پڑھو بیشک وہ تمہارے لیے نافل ہیں وہاں ” لفظنا فلہ یا تطوع “ فرمایا (ہر دو کا معنی ایک ہے) ۔ ان روایاتِ متاخرہ میں نفلوں سے منع فرمایا ان روایات کے استعمال پر بھی اتفاق ہے۔ تو ان کا حکم وہی ہوگا اور یہ گزشتہ روایات کی ناسخ بنیں گی جو ان کے مخالف ہیں۔ بعض روایات میں یہ بات مذکور نہیں ” فانھا لکم تطوع “ کہ وہ تمہارے حق میں نفل ہیں۔ تو اس میں احتمال ہے کہ اس کا معنی یہی ہو جو اس میں بیان ہو کہ وہ تمہارے حق میں نفل ہیں اور یہ بھی احتمال ہے کہ یہ اس زمانے کی بات ہو جب وہ ایک فرض دو مرتبہ ادا کرتے تھے۔ پس اس صورت میں دونوں نمازیں فرض ہوں گی۔ پھر اس سے روک دیا گیا۔ بہرحال ان میں جس احتمال کو بھی مانیں یہ ان کے لیے ناسخ بنیں گی۔ جن علماء کے نزدیک ظہر و عشاء کے علاوہ دوبارہ اور کوئی بھی نماز درست نہیں ‘ ان میں امام ابوحنیفہ ‘ ابو یوسف ‘ محمد (رح) بھی ہیں۔ روایات درج ذیل ہیں۔
تخریج : ابو داؤد فی الصلاۃ باب ٥٦‘ نمبر ٥٧٥‘ ترمذی فی الصلاۃ باب ٤٠‘ نمبر ٢١٩‘ نسائی فی الامامہ باب ٥٤‘ مسند احمد ٤؍١٦٠۔
حاصل روایات : جب آدمی نماز گھر میں پڑھ کر مسجد میں آئے اور لوگوں کو نماز میں مشغول پائے تو اسے جماعت میں شریک ہوجانا چاہیے ان روایات میں کسی نماز کی تعیین نہیں ہے ہر نماز میں شامل ہوسکتا ہے۔
فریق دوم کا مؤقف اور دلیل : ہر نماز جس کے بعد نوافل جائز نہیں ان کے علاوہ مغرب کو چھوڑ کر ہر نماز میں شامل ہوسکتے ہیں کیونکہ مغرب میں شامل ہوگا تو یہ نفل نہیں بن سکتے کیونکہ کوئی نفل طاق نہیں بلکہ وہ تو شفع شفع ہوتے ہیں ہر وہ نماز جس کے بعد نوافل جائز نہیں اس کو دوبارہ امام کے ساتھ پڑھنا جائز نہیں کیونکہ وہ نفل بنیں گے اور نفل اس وقت ممنوع ہیں جناب رسول اللہ (صلی اللہ علیہ وآلہ وسلم) سے متواتر روایات ان اوقات میں نوافل کی ممانعت کی وارد ہیں جن میں سے بعض ہم پہلے باب التطوع میں نقل کر آئے ہیں اس باب کی ابتداء میں نقل کردہ بعض روایات تو فصلوہا فانہا لکم نافلہ کے الفاظ وارد ہیں اور اس وقت نفل کی ممانعت وارد ہے جس پر سب کا اتفاق ہے تو وہ روایات ان کی بھی ناسخ ہیں۔ اور جن آثار میں یہ معنی مذکور نہیں ان میں دو احتمال ہیں۔
نمبر 1: یا تو یہی معنی ہے تو وہ نسخ میں داخل ہوگئیں۔
نمبر 2: شروع شروع میں ایک فرض دو مرتبہ پڑھنے کی اجازت تھی پھر یہ حکم منسوخ ہوا تو یہ روایات بھی منسوخ شمار ہوں گی۔
نمبر 3: یہ احتمال بھی ہے کہ وہ ان نمازوں سے ہو جو لوٹائی جاتی ہیں یعنی ان کے بعد نفل درست ہیں مثلاً ظہر ‘ عشائ۔
فقط ان نمازوں کے لوٹانے کا قول امام ابوحنیفہ (رح) و ابو یوسف (رح) و محمد (رح) کا قول ہے اور تابعین اور صحابہ کرام (رض) کی جماعت سے بھی یہ بات منقول ہے۔ آثار ملاحظہ ہوں۔