٢١٤ : حضرت بریدہ (رض) نے روایت نقل کی ہے کہ جناب نبی اکرم (صلی اللہ علیہ وآلہ وسلم) ہر نماز کے لیے وضو فرماتے تھے۔ علماء کی ایک جماعت کا خیال یہ ہے کہ مقیم افراد پر واجب ہے کہ وہ ہر نماز کے لیے وضو کریں اور انھوں نے اس روایت کو دلیل بنایا۔ علماء کی اکثریت نے ان کی مخالفت کی ہے۔ پس انھوں نے کہا کہ وضو تو اسی پر واجب ہے جو بےوضو ہو اور ان کے مسلک کی تائید جناب رسول اللہ (صلی اللہ علیہ وآلہ وسلم) کی یہ روایت ہے۔
تخریج : ابن ماجہ ١؍٣٨‘ باب الوضو لکل صلوۃ
حاصل روایات : آپ (صلی اللہ علیہ وآلہ وسلم) ہر نماز کے لیے نیا وضو کرتے تھے جو کہ حالت اقامت کا عمل ہے اور فتح کے دن والا عمل سفر کی حالت میں ہے پس مسافر ساری نمازیں ایک وضو سے بھی پڑھ سکتا ہے بظاہر اہل ظواہر نے ان روایات کو اپنا مستدل بنایا ہے۔
مسلک دوم :
حدث پیش آنے کی صورت میں تو وضو واجب ہے مگر وضو ہوتے ہوئے ہر نماز کے لیے وضو واجب نہیں مسافر کے لیے فریق مخالف نمبر ١ بھی اس کا قائل ہے اور مقیم کے لیے دیگر روایات کافی ثبوت ہیں ان روایات میں فضیلت کے لیے وضو کا احتمال ہے پس استدلال درست نہیں۔
روایات ملاحظہ ہوں۔