٢١٧٢: ابن عون نے شعبی انھوں نے مسروق کے متعلق اسی طرح بیان کیا۔
حاصل آثار : یہ تمام اکابر تابعین (رح) اور صحابہ کرام (رض) ہیں کہ جو فجر کی دو رکعت کو جماعت کے کھڑے ہوجانے کی صورت میں بھی ادائیگی کی تاکید کرتے تھے اور خود اسی پر عمل پیرا تھے پس ثابت ہوا کہ مسجد کے پچھلی جانب ان دو رکعت کی ادائیگی میں حرج نہیں اگرچہ امام جماعت شروع کرچکا ہو آثار و روایات کے لحاظ سے ہم ثابت کرچکے اب بطریق نظر اس پر نگاہ ڈالیں۔
نظر طحاوی (رح) :
غور فرمائیں کہ جو حضرات فریضہ میں داخل ہونے کو افضل و اولیٰ قرار دیتے ہیں اور فرماتے ہیں کہ دو رکعت کا ترک کردینا اس سے اولیٰ ہے کہ فرض کی شمولیت میں تاخیر کی جائے۔
ہم ان سے عرض کرتے ہیں کہ اس بات پر تو سب کا اتفاق ہے کہ اگر کوئی شخص مسجد میں موجود ہو اور اسے جماعت کے کھڑے ہونے کا علم ہوگیا اور اسے معلوم ہے کہ وہ فجر کی سنت پڑھ کر جماعت میں شامل ہوسکتا ہے تو اسے فجر کی دو رکعت پڑھ کر جماعت میں شامل ہونا چاہیے اور اگر جماعت کے فوت ہوجانے کا خدشہ ہو تو انھیں ادا نہ کرے کیونکہ اس کو دو فرض سے پہلے ادا کرنے کا حکم ہے۔
اور اس پر اتفاق نہیں کہ فرض کی طرف چل کر آنا اپنے گھر میں دو رکعتوں میں مشغول ہونے سے افضل ہے حالانکہ ان نوافل کی جتنی تاکید ہے کسی نفل نماز کی اس قدر تاکید نہیں ہے اور روایات میں وارد ہے کہ آپ کسی نفل نماز پر اس قدر دوام کرنے والے نہ تھے جس قدر دوام ان پر ثابت ہے آپ (صلی اللہ علیہ وآلہ وسلم) نے فرمایا ولا تترکوہما وان طردتکم الخیل۔
تخریج : ابو داؤد فی التطوع باب ٣‘ نمبر ٦٢٥٨‘ مسند احمد ٢؍٤٠٥۔
ان کو ایسی حالت میں بھی مت چھوڑو جبکہ گھوڑوں کے روندنے کا خطرہ لاحق ہو۔ تو جب اس قدر تاکید اور ترغیب ان کے متعلق دلائی گئی اور ان کے چھوڑنے کی ممانعت فرمائی اور یہ دو رکعت گھروں میں فرائض سے قبل پڑھی جاتی ہیں تو پھر فرض سے قبل مسجد میں بھی پڑھی جانی چاہئیں قیاس و نظر یہی کہتے ہیں۔
یہی امام ابوحنیفہ و ابو یوسف و محمد (رح) کا قول ہے۔
حاصل روایات : : یہاں بھی امام طحاوی (رح) نے اپنے طرز کے مطابق اپنی رائے کے خلاف قول کو ذکر کیا تو ان کے دلائل کے جوابات نقد دیتے چلے گئے ادھار نہیں چھوڑے اور جب میدان صاف ہوگیا تو پھر اپنے دلائل پیش کر کے عمل صحابہ وتابعین سے ان کی تائید بھی فرمائی اور آخر میں نظری دلیل لائے جس کو تنویر علی الدلیل کہنا چاہیے۔