٢١٩٣: موسیٰ بن محمد بن ابراہیم نے اپنے والد سے نقل کیا کہ حضرت سلمہ بن اکوع (رض) نے بیان کیا کہ میں نے جناب رسول اللہ (صلی اللہ علیہ وآلہ وسلم) سے گزارش کی کہ میں شکار کا سامنا کرتا ہوں کیا میں ایک قمیص میں نماز ادا کرسکتا ہوں آپ نے فرمایا جی ہاں۔ البتہ اس کے دونوں کناروں کو سی لو اگرچہ کانٹے سے ہو۔ ان روایات سے ثابت ہوتا ہے کہ ایک کپڑے میں نماز درست ہے۔ پس یہ روایات ان سے متضاد و مخالف ہیں جن میں ایک کپڑے میں نماز سے روکا گیا ہے۔ ان روایات میں اس بات کی دلالت پائی جاتی ہے کہ جب کپڑے میسر ہوں یا تنگ دستی ہو کسی حالت میں بھی حرج نہیں اور اس کی وجہ یہ ہے کہ سوال کرنے والے نے جناب رسول اللہ (صلی اللہ علیہ وآلہ وسلم) سے دریافت کیا کہ کیا کوئی شخص ایک کپڑے میں نماز کی ادائیگی کرسکتا ہے۔ تو جناب رسول اللہ (صلی اللہ علیہ وآلہ وسلم) نے بلا کسی پابندی لگائے جواب دیا کہ تم میں سے ہر ایک کو دو کپڑے میسر ہیں۔ مطلب یہ ہوا کہ اگر ایک کپڑے میں نماز ناپسند و مکروہ ہوتی تو جس کے پاس ایک کپڑا ہوتا اس کی نماز مکروہ ہوتی (نہ کہ دو والے کی) ۔ آپ کا جواب اس بات کو ثابت کررہا ہے کہ جس کے پاس دو کپڑے ہوں اس کے لیے ایک کپڑے میں نماز کا وہی حکم ہے جو اس کے لیے حکم ہے جس کے پاس صرف ایک کپڑا ہے اور اس کے علاوہ موجود نہیں۔
تخریج : بخاری فی الصلاۃ باب ٢‘ ابو داؤد فی الصلاۃ باب ٧٩‘ نمبر ٦٣٢‘ نسائی فی القبلہ باب ١٥‘ مسند احمد ٤؍٤٩۔
حاصل روایات : ان آثار سے ایک کپڑے میں نماز کی اباحت ثابت ہو رہی ہے یہ ان لوگوں کی بات کے خلاف ہے جو ایک کپڑے میں نماز کو درست نہیں کہتے اور اس سے یہ بات بھی ثابت ہوتی ہے کہ کپڑا ہونے یا نہ ہونے دونوں صورتوں میں درست ہے اور اس کی دلیل یہ ہے کہ سائل نے جناب رسول اللہ (صلی اللہ علیہ وآلہ وسلم) سے یہ سوال کیا کیا ہم ایک کپڑے میں نماز پڑھ سکتے ہیں ؟ تو آپ نے جواب میں مطلق فرمایا کیا تم میں سے ہر ایک دو کپڑے پاتا ہے اس مطلق جواب نے دونوں حالتوں کو داخل کردیا اگر ایک کپڑے میں نماز مکروہ ہوتی تو جو ایک ہی کپڑا پاتا ہو اس کے لیے نماز میں کراہت قرار دی جاتی مگر آپ کے جواب نے یہ ظاہر کردیا کہ ایک کپڑے میں نماز پڑھنے والا جبکہ اس کے پاس دو کپڑے ہوں اور وہ شخص جس کے پاس ایک ہی کپڑا ہو دوسرا نہ ہو دونوں حکم میں برابر ہیں۔
کپڑے کا طریقہ استعمال :
روایات ملاحظہ ہوں۔