٢٢٥٨: عروہ نے عثمان بن طلحہ (رض) سے نقل کیا کہ جناب رسول اللہ (صلی اللہ علیہ وآلہ وسلم) بیت اللہ میں داخل ہوئے اور سامنے کی جانب دو رکعت نماز دو ستونوں کے درمیان ادا کی۔ امام طحاوی (رح) کہتے ہیں کہ اگر اس باب کو متواتر آثار کی تصحیح سامنے رکھتے ہوئے دیکھا جائے تو پھر جناب رسول اللہ (صلی اللہ علیہ وآلہ وسلم) سے کثیر روایات وارد ہوئی ہیں کہ آپ نے کعبہ شریف میں نماز ادا کی اور اس کے بالمقابل بیت اللہ شریف میں نماز ادا نہ کرنے کی روایات اس قدر زیادہ نہیں اور اگر اس لحاظ سے لیا جائے کہ ان میں سے متضاد روایات کو ترک کر کے ان کے علاوہ روایات میں جو کچھ ہے اس کو اختیار کیا جائے تو ابن عباس (رض) نے اسامہ (رض) سے نقل کیا کہ جناب رسول اللہ (صلی اللہ علیہ وآلہ وسلم) جب کعبہ میں داخل ہوئے تو اس سے نماز پڑھے بغیر باہر تشریف لائے۔ حضرت ابن عمر (رض) نے انہی سے روایت کی کہ جناب رسول اللہ (صلی اللہ علیہ وآلہ وسلم) نے اس میں داخل ہو کر نماز ادا فرمائی۔ یہ بات پہلی بات سے متضاد ہے۔ پس دونوں نے ایک دوسرے کی نفی کردی۔ پھر حضرت عمر ‘ بلال ‘ جابر ‘ شیبہ بن عثمان ‘ عثمان بن طلحہ (رض) تمام کی روایات ابن عمر (رض) کی اس روایت سے موافقت کرنے والی ہیں جو انھوں نے حضرت اسامہ (رض) سے نقل کی ہے۔ پس ان کی روایت ابن عباس (رض) کی منفرد روایت سے اولیٰ ہے۔ پھر دوسری بات یہ ہے کہ جناب رسول اللہ (صلی اللہ علیہ وآلہ وسلم) کا قول بیت اللہ شریف میں نماز کے جواب کو ثابت کرتا ہے۔
حاصل کلام :
اگر روایات کے تواتر کو دیکھا جائے تو بیت اللہ میں داخلہ کی روایات کثرت سے ہیں اور نماز پڑھنے کو ثابت کرتی ہیں جبکہ دوسری روایت جو نماز کی نفی کرتی ہیں قلیل ہیں تو پھر متواتر روایات کو لیا جائے گا۔
اور اگر تضاد سے تساقط کرنا ہو تو پھر غور کریں کہ ابن عباس (رض) نے بھی اسامہ بن زید سے داخل ہونے مگر نماز نہ پڑھنے کی روایات لی ہیں اور ابن عمر (رض) نے انہی اسامہ سے داخل ہو کر نماز پڑھنے کی روایات لی ہیں تو تضاد کو گرا دیں۔
دوسری طرف عمر بلال ‘ جابر ‘ شیبہ بن عثمان ‘ عثمان بن طلحہ (رض) کی روایات اس مضمون کو ثابت کرتی ہیں جو ابن عمر (رض) کی روایت میں موجود ہے اور ادھر ابن عباس (رض) اسامہ سے نقل کرنے میں منفرد نظر آتے ہیں تب بھی ابن عمر (رض) والا مؤقف ثابت ہوتا ہے پھر اس سے چند قدم آگے جناب رسول اللہ (صلی اللہ علیہ وآلہ وسلم) سے ایسی روایات وارد ہیں جو بیت اللہ میں نماز کو ثابت کرتی ہیں جو اس مؤقف کو مزید تقویت ہی نہیں دیتیں بلکہ پختہ کرتی ہیں۔
ایسی روایات ملاحظہ ہوں جو نماز کا جواز ثابت کرتی ہیں۔ روایات جواز۔