٢٢٨٦: خارجہ بن زید بن ثابت کہتے ہیں کہ زید بن ثابت (رض) مسجد کی چوکھٹ کے پاس قبلہ رخ ہو کر رکوع کرتے پھر وہ اپنی دائیں مڑتے ہوئے چلتے رہتے پھر اسی سے شمار کرتے خواہ صف میں پہنچیں یا نہ پہنچیں۔ اگر کوئی معترض یہ کہے کہ تم تو ابن مسعود اور زید (رض) کی عروایت سے مخالفت کرنے والے ہو۔ تمہارا کہنا یہ ہے کہ کسی کو صف سے پہلے رکوع مناسب نہیں۔ اس کو جواب میں کہا جائے گا جی ہاں ! مگر ہم نے تو ان روایات سے تمہارے خلاف دلیل حاصل کی تاکہ تمہیں یہ علم ہوجائے کہ تمام صحابہ کرام (رض) صف میں پہنچنے سے قبل نماز میں شامل ہونے والے کی نماز کو باطل قرار نہ دیتے تھے۔ اگر کسی کو یہ اعتراض ہو کہ ابن مسعود اور زید (رض) کی روایت کے خلاف چل کر تم نے کس روایت کو اختیار کیا ہے ؟ ت جواب میں کہا جائے گا۔ ہم نے روایت حضرت ابوہریرہ (رض) کو اختیار کیا ہے کہ ” لا یرکع احدکم دون الصف “ (الحدیث) کہ تمہارا کوئی شخص صف سے پہلے رکوع میں نہ جائے۔ جب تک کہ وہ صف میں اپنے ٹھکانے نہ پہنچے اور یہ بات حضرت حسن بصری (رح) نے بھی کہی ہے۔
: ابن ابی شیبہ ١؍٢٢٩‘ باب الرجل یدخل والقوم رکوع۔
حاصل روایات : ان روایات نے ثابت کردیا کہ ایک آدمی رکوع کی حالت میں ملے یا دو چار ملیں سب کا حکم برابر ہے اور وہ رکعت بھی شمار ہوگی اور رکوع ملنا بھی معتبر خیال کیا جائے گا۔
اعتراض نمبر 2:
زید بن ثابت اور ابن مسعود (رض) نے آثار اس روایت کے خلاف ہیں جس میں یہ فرمایا گیا لاینبغی لاحد ان یرکع دون الصف۔
جواب : یہ دونوں آثار اگرچہ اس روایت کے خلاف معلوم ہوتے ہیں مگر ہم نے تو صرف اس غرض سے پیش کئے ہیں کہ اصحاب رسول اللہ (صلی اللہ علیہ وآلہ وسلم) اس شخص کی نماز کو باطل قرار نہ دیتے تھے جو صف سے پہلے نماز میں شامل ہوجائے اگرچہ یہ مناسب نہیں مگر ابطال نماز والے قول کی تردید کے لیے کافی ہے۔
احناف پر اشکال :
کہ تم اپنے مسلک میں تو عبداللہ اور زید (رض) کے اقوال کے مخالف ہو۔
جواب : ہم نے حضرت ابوہریرہ (رض) والی روایت نقل کی تم میں کوئی صف کے علاوہ رکوع میں نہ جائے جب تک کہ وہ اپنی جگہ صف میں نہ پہنچ جائے اور ان کے علاوہ یہ حسن بصری (رح) کا بھی قول ہے۔ ملاحظہ ہو۔