٢٣١٢: ارقم بن شرحبیل کہتے ہیں کہ میں نے حضرت ابن عباس (رض) کے ساتھ مدینہ سے شام کا سفر کیا تو آپ نے فرمایا جب آپ (صلی اللہ علیہ وآلہ وسلم) اس مرض میں مبتلا ہوئے جس میں آپ کی وفات ہوئی اس وقت آپ (صلی اللہ علیہ وآلہ وسلم) حضرت عائشہ (رض) کے گھر میں تھے آپ نے فرمایا میرے لیے حضرت علی (رض) کو بلاؤ تو حضرت عائشہ (رض) نے کہا کیا ہم آپ کے لیے ابوبکر (رض) کو نہ بلا دیں ؟ آپ نے فرمایا انہی کو بلاؤ پس حفصہ (رض) کا بیان ہے کیا ہم آپ کے لیے عمر (رض) کو نہ بلا دیں فرمایا اس کو بلاؤ تو ام فضل کہتی ہیں کیا ہم آپ کے لیے آپ کے چچا عباس کو نہ بلا دیں آپ نے فرمایا ان کو بلاؤ جب یہ تمام حضرات آگئے تو آپ نے فرمایا لوگوں کو ابوبکر نماز پڑھائیں پس ابوبکر (رض) آگے بڑھے اور انھوں نے لوگوں کو نماز پڑھائی۔ امام طحاوی (رح) کہتے ہیں کہ اس روایت میں یہ مذکور ہے کہ حضرت ابوبکر (رض) نے کھڑے ہو کر آپ کی اقتداء کی جبکہ جناب نبی اکرم (صلی اللہ علیہ وآلہ وسلم) بیٹھ کر نماز کی امامت فرما رہے تھے۔ یہ جناب رسول اللہ (صلی اللہ علیہ وآلہ وسلم) کا فعل ہے اس کے بعد کہ وہ آپ کا قول ہے جو باب اوّل کی روایات میں گزرا۔
جناب رسول اللہ (صلی اللہ علیہ وآلہ وسلم) نے کچھ آرام محسوس کیا تو دو آدمیوں کے درمیان سہارا دے کر نکلے۔
فلما احسہ ابوبکر سبحوا بہ ایک نسخہ یہ ہے جب ابوبکر (رض) نے آپ کی آمد کو محسوس کیا اور لوگوں نے بھی سبحان اللہ سبحان اللہ کہا۔
فلما راہ الناس سبحوابابی بکر۔ یہ دوسرا نسخہ ہے جب لوگوں نے آپ کو دیکھا تو سبحان اللہ سبحان اللہ کہنے لگے۔
پس ابوبکر پیچھے پیچھے ہٹنے لگے تو جناب نبی اکرم (صلی اللہ علیہ وآلہ وسلم) نے ان کو اپنی جگہ رکنے کا اشارہ فرمایا پھر جناب رسول اللہ (صلی اللہ علیہ وآلہ وسلم) نے قراءت کو وہیں سے شروع فرمایا جہاں سے ابوبکر نے چھوڑی تھی اس وقت جناب رسول اللہ (صلی اللہ علیہ وآلہ وسلم) بیٹھے اور ابوبکر (رض) کھڑے تھے ابوبکر جناب رسول اللہ (صلی اللہ علیہ وآلہ وسلم) کی اقتداء کر رہے تھے اور لوگ ابوبکر (رض) کی۔ جب جناب رسول اللہ (صلی اللہ علیہ وآلہ وسلم) نے نماز کو مکمل کرلیا تو طبیعت بوجھل ہوگئی تو آپ وہاں سے دو آدمیوں کے سہارے نکلے اس وقت آپ کے پاؤں مبارک زمین پر گھسٹتے جا رہے تھے۔ پس آپ (صلی اللہ علیہ وآلہ وسلم) کی وفات ہوگئی اور آپ نے کوئی وصیت و نصیحت نہیں فرمائی۔
: ابن ماجہ فی الاقامہ نمبر ١٢٣٥۔
تنبیہ طحاوی (رح) :
یہ ابوبکر (رض) جناب رسول اللہ (صلی اللہ علیہ وآلہ وسلم) کی اقتداء کھڑے ہو کر کر رہے ہیں اور جناب رسول اللہ (صلی اللہ علیہ وآلہ وسلم) بیٹھے ہوئے تھے گزشتہ روایات میں آپ کے جو اقوال گزرے ان کے بعد یہ آپ کا فعل ہے جو بیٹھنے والے کے پیچھے کھڑے ہو کر اقتداء کو ثابت کررہا ہے۔