٢٣٤٣: سعید بن جبیر نے حضرت ابن عباس (رض) سے نقل کیا انھوں نے جناب رسول اللہ (صلی اللہ علیہ وآلہ وسلم) سے اسی طرح کی روایت نقل کی ہے۔ امام طحاوی (رح) فرماتے ہیں کہ جب جناب نبی اکرم (صلی اللہ علیہ وآلہ وسلم) سے یہ روایات وارد ہوئی ہیں کہ آپ نے عیدین اور جمعہ کی نمازوں میں اس کے علاوہ بھی قراءت کی ہے ‘ البتہ وہ پہلے آثار جن میں عدم جواز معلوم ہوتا ہے تو اس کو بجائے اس کے کہ ہم تضاد اور ایک دوسرے کی روایت کی تکذیب پر محمول کریں ہم انھیں ایک دوسرے کی تصدیق پر محمول کریں گے اور تمام کو رسول اللہ (صلی اللہ علیہ وآلہ وسلم) کا عمل قرار دیں گے اور وہ اس طرح کہ کبھی آپ (صلی اللہ علیہ وآلہ وسلم) نے ان کو پڑھا اور کبھی دوسری سورتوں کو پڑھا۔ روایت میں جو موجود تھے انھوں نے اپنا مشاہدہ نقل کردیا اور اس میں اس بات کا ثبوت مل گیا کہ کسی نماز کے لیے کوئی قراءت مقرر نہیں ہے اور امام کو اختیار ہے کہ فاتحۃ الکتاب کے ساتھ قرآن مجید کا جونسا حصہ بھی پڑھے درست ہے اور اسی طرح وہ جو جناب نبی اکرم (صلی اللہ علیہ وآلہ وسلم) سے منقول ہے کہ آپ جمعہ کے دن فجر کی نماز میں یہ قراءت کرتے تھے۔
تخریج : مسلم فی الجمعہ روایت نمبر ٦٤۔
حاصل روایات : جمعہ و عیدین میں ان سورتوں کے علاوہ دیگر سورتوں کو بھی آپ (صلی اللہ علیہ وآلہ وسلم) نے تلاوت فرمایا یہ تضاد پر محمول کرنا مناسب نہیں اس لیے ہم ان روایات میں اور فصل اول کی روایات میں موافقت پیدا کرتے ہیں ہم عرض کرتے ہیں کہ یہ تمام سورتیں آپ نے تلاوت فرمائیں کبھی وہ اور کبھی وہ تو ہر صحابی نے وہ بیان کی جس نماز میں وہ موجود تھے۔ پس اس میں یہ ثبوت مل گیا کہ اس میں قراءت کی توقیت نہیں امام کو فاتحہ الکتاب کے ساتھ قرآن کے جس حصہ سے چاہے پڑھنے کی اجازت ہے۔
مزید روایات تائید کے لیے ملاحظہ فرمائیں۔