٢٤١٥: حبان بارقی کہتے ہیں کہ میں نے حضرت ابن عمر (رض) سے کہا میں عراق کی طرف جا رہا ہوں میں کس طرح نماز ادا کروں انھوں نے فرمایا اگر تم چار پڑھو تو تم شہر میں ہو اور اگر دو پڑھو تو مسافر ہو۔ لو یہ حضرت عثمان بن عفان ‘ عائشہ صدیقہ ‘ حذیفہ بن الیمان اور ابن عمر (رض) ہیں کہ جن سے سفر میں نماز کی تکمیل سے متعلق منقول ہوئیں۔ ان حضرات میں سے ہر ایک کے پاس اپنے اختیار کردہ عمل کی کوئی نہ کوئی وجہ ہے جس کا عنقریب ہم تذکرہ کریں گے اور بطریق نظر و فکر ہر ایک کے معنی پر جو چیز لازم ہوتی ہے وہ بھی ذکر کریں گے۔ ان شاء اللہ۔ وضاحت سنیے یہ حضرت عثمان (رض) ہیں جنہوں نے منیٰ میں نماز کو مکمل کیا تو وہ اس بناء پر نہ تھی کہ وہ سفر میں قصر کے قائل نہ تھے اور اس کا قطعاً واہمہ بھی نہیں کیا جاسکتا جبکہ اللہ تعالیٰ نے فرمایا : { واذا ضربتم فی الارض۔۔۔} (الآیۃ) اللہ تعالیٰ نے اس آیت میں قصر کو ان کے لیے اس وقت مباح کیا ہے۔ جبکہ کفار کے فتنہ میں مبتلا کرنے کا خطرہ ہو پھر جناب رسول اللہ (صلی اللہ علیہ وآلہ وسلم) نے اس بات کی اطلاع دی کہ یہ ان کے لیے لازم ہے خواہ وہ امن کی حالت میں ہوں۔ یہ بات حضرت یعلی بن منیہ کی روایت میں موجود ہے جیسا کہ حضرت عمر (رض) کی وساطت سے یہ روایت اسی باب کی ابتداء میں مذکور ہے اور جناب رسول اللہ (صلی اللہ علیہ وآلہ وسلم) نے منیٰ میں دو رکعت نماز ادا کی جبکہ وہ تعداد میں بھی زیادہ اور خوب امن میں بھی تھے اور اس وقت عثمان بھی ان کے ساتھ تھے۔ تو حضرت عثمان (رض) نے منیٰ میں نماز کو دراز یعنی چار رکعت اس لیے ادا نہیں کیا کہ وہ قصر کا سفر میں انکار کرتے تھے بلکہ اس کی وجہ میں اختلاف کیا گیا ہے۔ روایت یہ ہے۔
حاصل کلام :
یہ عثمان بن عفان ‘ حذیفہ بن یمان ‘ حضرت عائشہ صدیقہ اور حضرت ابن عمر (رض) ہیں ان سے سفر میں نماز کو مکمل کرنے کی روایات ہیں۔
ان روایات کا تاویلی معنی :
حضرت عثمان (رض) کے متعلق تو گزارش یہ ہے کہ ان کا مکمل کرنا اس وجہ سے نہ تھا کہ وہ سفر میں قصر کے قائل نہ تھے اور یہ کیسے تصور کیا جاسکتا ہے جبکہ اللہ تعالیٰ کا ارشاد ہے۔ واذا ضربتم فی الارض (النساء ١٠١) اللہ تعالیٰ نے قصر کو اس آیت میں مباح قرار دیا جبکہ کفار کے فتنے کا خوف دامن گیر ہو اور جناب رسول اللہ (صلی اللہ علیہ وآلہ وسلم) نے ان کو اس کے وجوب کی اطلاع دی اور یقیناً وہ یعلی بن منیہ والی روایت ہے جس کو ہم بیان کر آئے وہ امن والے اور اکثریت والے تھے آپ (صلی اللہ علیہ وآلہ وسلم) نے منیٰ میں نماز دو رکعت پڑھائی اور عثمان (رض) بھی آپ کے ساتھ پس منیٰ میں ان کا مکمل کرنا اس وجہ سے تو نہیں ہوسکتا کہ وہ قصر کا انکار کرنے والے تھے بلکہ اس بنیاد پر انھوں نے منیٰ میں نماز پوری کی جس کے متعلق مختلف روایات ملتی ہیں۔