٢٤٢٦: نافع نے حضرت ابن عمر (رض) سے انھوں نے جناب نبی اکرم (صلی اللہ علیہ وآلہ وسلم) سے اسی طرح روایت نقل کی ہے۔ امام طحاوی (رح) کہتے ہیں کہ بعض علماء نے کہا کہ مسافر کو سواری پر وتر ادا کرنے میں چنداں قباحت نہیں ‘ جیسا کہ دیگر نوافل پڑھے جاتے ہیں۔ انھوں نے جناب رسول اللہ (صلی اللہ علیہ وآلہ وسلم) سے منقول آثار اور فعل ابن عمر (رض) کو دلیل بنایا۔ دیگر علماء نے ان سے اختلاف کرتے ہوئے کہا کہ کسی کو سواری پر وتر جائز نہیں بلکہ وہ زمین پر ادا کرے گا جیسا فرائض میں کیا جاتا ہے اور ان کی دلیل درج ذیل آثار سے ہے۔ یہ اثر اس کے مخالف ہے جس سے اوّل قول والوں نے دلیل اخذ کی ہے اور جس کو ہم نے ابن عمر (رض) کی روایت سے جناب نبی اکرم (صلی اللہ علیہ وآلہ وسلم) سے نقل کیا ہے۔ دوسری بات یہ ہے کہ ابن عمر (رض) کی اپنی روایات بھی اپنے اس قول کے خلاف اور دوسرے قول کی موافقت میں آئی ہیں۔ جو درج ذیل ہیں۔
تخریج : مسلم فی المسافرین نمبر ٣١‘ ٣٢۔
حاصل روایات : ان روایات سے یہ بات ثابت ہوئی کہ جس طرح نوافل کو سواری پر ادا کرسکتے ہیں خواہ وہ کسی رخ پر جائے بالکل اسی طرح وتروں کی ادائیگی بھی سواری پر درست ہے فرائض کی طرح ان کو زمین پر اتر کر ادا کرنا ضروری نہیں۔
مؤقف فریق ثانی و دلائل : سواری پر وتر جائز نہیں ان کو فرائض کی طرح زمین پر ادا کرنا ضروری ہیں وتر واجب ہیں نفل نہیں ان کا حکم اسی وجہ سے نوافل سے مختلف ہے دلائل یہ روایات ہیں۔