٢٤٤٥: ہلال بن عیاض کہتے ہیں کہ مجھے حضرت ابو سعید خدری (رض) نے بتلایا کہ ہمیں جناب رسول اللہ (صلی اللہ علیہ وآلہ وسلم) نے فرمایا جب تم میں سے کوئی نماز پڑھے اور اسے معلوم نہ رہے کہ اس نے تین پڑھی ہیں یا چار تو اسے بیٹھ کر دو سجدے کرلینے چاہئیں۔ امام طحاوی (رح) کہتے ہیں کہ بعض علماء اس طرف گئے ہیں کہ یہ اس شخص کا حکم ہے جس کو اپنی نماز میں شک ہوجائے اور اسے معلوم نہ ہو کہ آیا اس نے اس میں اضافہ کیا ہے یا کمی ‘ تو قعدہ کی حالت میں سلام پھیر کر اس پر صرف دو سجدے لازم ہیں۔ مگر دیگر حضرات نے فرمایا کہ وہ کم رکعات پر بنیاد رکھے تاکہ اسے یقینی طور پر معلوم ہوجائے کہ اس نے اپنے ذمہ فریضہ کو ادا کردیا ہے۔ رہی یہ روایت تو اس میں اس بات کی کوئی دلیل نہیں کہ نمازی پر ان دو سجدات کے علاوہ کوئی چیز لازم نہیں۔ کیونکہ جناب رسول اللہ (صلی اللہ علیہ وآلہ وسلم) سے روایت میں اس سے اضافہ بھی مذکور ہے۔ آپ نے نمازی پر دو سجدات سے پہلے یہ لازم کردیا کہ وہ یقین پر بنیاد رکھے تاکہ اسے قطعی طور پر علم ہوجائے کہ اس نے اپنے فریضہ کو صحیح ادا کردیا ہے۔ روایت ذیل میں ہے۔
تخریج : ابو داؤد فی الصلاۃ باب ١٩٢‘ نمبر ١٠٢٩‘ ترمذی فی الصلاۃ باب ١٧٤‘ ٣٩٦۔
حاصل روایات : ان روایات سے ثابت ہوتا ہے کہ جس کو نماز پڑھتے یہ یاد نہ رہے کہ اس کی تین رکعت ہوئیں یا چار تو اسے سہو کے دو سجدے کرلینے کافی ہیں مزید کسی بات کی حاجت نہیں۔
مؤقف فریق ثانی و دلیل : جس کو یہ یاد نہ رہے کہ اس نے تین رکعت پڑھی ہیں یا چار تو وہ اقل کو بنیاد بنائے کہ وہ یقینی ہیں اور بقیہ نماز اس کے مطابق سجدہ سہو سے مکمل کرلے۔
فریق اوّل کا جواب :
ان روایات میں ہرگز ایسی کوئی دلیل نہیں جو یہ بتلائے کہ اس پر سوائے سجدہ سہو کے کوئی چیز لازم نہیں کیونکہ اس سے زائد بات والی روایات موجود ہیں اسے دو سجدوں سے پہلے یقین پر ِبنا کرنی ہوگی تاکہ اسے معلوم ہو کہ یقینی طور پر اس کے ذمہ کتنی رکعات باقی ہیں۔ جیسا کہ یہ روایات شاہد ہیں۔