٢٤٤٧: کریب مولیٰ ابن عباس (رض) سے روایت ہے کہ میں حضرت عمر بن خطاب (رض) کے پاس بیٹھا تو انھوں نے کہا اے ابن عباس (رض) ! کیا تم نے جناب رسول اللہ (صلی اللہ علیہ وآلہ وسلم) سے اس آدمی کے متعلق سنا جو نماز میں بھول جائے اور یہ یاد نہ رہے کہ آیا مامورہ رکعات میں اس نے اضافہ کیا ہے یا کمی ؟ میں نے کہا اے امیرالمؤمنین آپ نے جناب رسول اللہ (صلی اللہ علیہ وآلہ وسلم) سے اس سلسلہ میں کچھ سنا ہے تو انھوں نے کہا نہیں۔ اللہ کی قسم ! نہ میں نے اس سلسلے میں کوئی چیز سنی اور نہ میں نے آپ سے کچھ دریافت کیا۔ اچانک اس وقت عبدالرحمن بن عوف آگئے اور کہنے لگے تم کس بارے میں گفتگو کر رہے ہو ؟ عمر (رض) نے ان کو بتلایا کہ میں نے اس نوجوان سے یہ دریافت کیا مگر میں نے ان کے پاس کوئی بات اس سلسلے میں نہیں پائی۔ تو عبدالرحمن بن عوف (رض) کہنے لگے لیکن میں نے جناب رسول اللہ (صلی اللہ علیہ وآلہ وسلم) سے اس سلسلہ میں سن رکھا ہے عمر (رض) کہنے لگے تم ہمارے ہاں انصاف والے پسندیدہ آدمی ہو تم بتاؤ تم نے کیا سنا ہے ؟ عبدالرحمن (رض) : میں نے جناب نبی اکرم (صلی اللہ علیہ وآلہ وسلم) کو فرماتے سنا ہے جب تم میں سے کسی کو نماز میں شک ہوجائے ایک اور دو میں شک ہو تو اس کو ایک شمار کرے اور جب تین یا چار میں شک ہو تو ان کو تین قرار دے یہاں تک کہ اضافے کا خیال پیدا ہوجائے پھر سلام سے پہلے دو سجدے کرے۔
تخریج : ابن ماجہ فی الاقامہ نمبر ١٢٠٩۔