٢٤٥٧: زائد بن قدامہ نے منصور سے نقل کیا پھر انھوں نے اپنی سند سے اسی طرح روایت کی ہے۔ اس روایت میں تحری پر عمل کا ذکر ہے اور روایات کی تصحیح اس قول کے قائلین کی بات کو لازم کر رہی ہے۔ کیونکہ اگر یہ معنی باطل ہوجائے اور سوچ و بچار ضروری نہ رہے تو اس روایت کی نفی ہوجائے گی اور اگر ہم تحری پر عمل کو لازم قرار دیں جبکہ اس کی ایک رائے ٹھہر جائے اور اگر رائے قرار نہ پائے تو قلیل پر بناء کی جائے تو اس صورت میں روایت عبدالرحمن بن عوف (رض) اور روایت ابو سعید اور روایت ابن مسعود (رض) برابر ہو کر ہر روایت کا ایک الگ معنی بن جائے گا جو دوسری میں نہیں۔ اس طرح مناسب یہ ہے کہ آثار کو ایسے معنی پر نکالا جائے اور جس حد تک ہو سکے اتفاق پر محمول کیا جائے اور تضاد سے بچا جائے سوائے اس صورت میں کہ جب اس کے علاوہ اور کوئی راہ نہ ملے۔ آثار کے معانی کی تصحیح کا یہی تقاضا ہے اور یہی امام ابوحنیفہ ‘ ابویوسف و محمد (رح) کا قول ہے اور جس روایت سے ان حضرات کے مذہب کی تائید ہوتی ہے وہ یہ ہے کہ حضرت ابوہریرہ (رض) کی اسناد سے جناب نبی اکرم (صلی اللہ علیہ وآلہ وسلم) سے وہ روایت نقل کی ہے جو اس باب کی ابتداء میں گزری۔ پھر حضرت ابوہریرہ (رض) نے اپنے اجتہاد سے فرمایا کہ وہ تحری کرلے۔
حاصل روایات : ان روایات سے معلوم ہوتا ہے کہ تحری پر عمل کیا جائے اور اگر گمان غالب نہ ہو تو پھر اقل پر عمل کیا جائے تمام آثار کی تصحیح تو اس چیز کو لازم کر رہی ہے جو فریق ثالث نے کہی کیونکہ اگر اس مفہوم کو باطل قرار دیا جائے اور تحری کو لازم نہ قرار دیں تو اس حدیث کے مضمون کی نفی ہوجاتی ہے اور اگر اس کی رائے ہو اور اس پر عمل کو لازم قرار دیا جائے اور رائے نہ ہونے کی صورت میں اقل کو بنیاد بنایا جائے تو عبدالرحمن بن عوف ‘ ابو سعید ‘ ابن مسعود (رض) کی روایات برابر ہوجاتی ہیں پس ان میں سے ہر ایک ایک ایسے معنی میں ہوجاتی ہے جو اس معنی سے مختلف ہے جو دوسری روایت میں وارد ہوا ہے اس طرح آثار کو جہاں تک ممکن ہو اتفاق پر محمول کریں اور تضاد پر حتی الامکان محمول نہ کریں۔
آثار کے معانی کے لحاظ سے اس باب کا حکم یہ ہے یہی امام ابوحنیفہ ‘ ابو یوسف ‘ محمد (رح) کا قول ہے۔
اور ایک اور چیز بھی فریق ثالث کے قول کی تصحیح کرتی ہے کہ حضرت ابوہریرہ (رض) سے ہم نے جناب نبی اکرم (صلی اللہ علیہ وآلہ وسلم) کا ارشاد اس باب کے شروع میں نقل کیا ہے پھر انھوں نے اپنی رائے اور اجتہاد سے یہ کہا انہ یتحرٰی روایت یہ ہے۔