٢٥٢٨: مقبری نے حضرت ابوہریرہ (رض) سے نقل کیا کہ جناب نبی اکرم (صلی اللہ علیہ وآلہ وسلم) نے دو رکعت مکمل کیں پھر اسی طرح روایت نقل کی البتہ سجدہ سے پہلے سلام کا ذکر نہیں۔ امام طحاوی (رح) کہتے ہیں کہ بعض علماء یہ کہتے ہیں کہ اگر امام اپنے مقتدیوں سے ایسی گفتگو کرے جو نماز سے متعلق ہو تو اس سے نماز فاسد نہ ہوگی اسی طرح امام اور مقتدیوں کے بھول کر گفتگو کرنے سے بھی نماز نہیں ٹوٹتی۔ انھوں نے اپنی اس بات کے لیے حضرت ذوالیدین (رض) کی جناب رسول اللہ (صلی اللہ علیہ وآلہ وسلم) کے ساتھ گفتگو سے استدلال کیا ہے۔ جیسا گزشتہ روایات میں مذکور ہے۔ اسی طرح بھول کر کلام سے امام اور مقتدیوں ہر دو کی نماز نہیں ٹوٹتی۔ اس کی دلیل بھی ذوالیدین کی یہ گفتگو ” اقصرت الصلاۃ ام نسیت یا رسول اللّٰہ “ اور آپ کا جواب ” کل ذلک لم یکن لم تقصر الصلاۃ ولم انس “ ہے۔ حالانکہ وہ اس بات کو جان رہا تھا کہ آپ نماز میں نہیں ہیں۔ وہ کہتے ہیں کہ جب آپ نے پڑھی گئی نماز پر بناء کی تو یہ باتیں نہ ذوالیدین کے لیے نماز کو قطع کرنے والی بنیں اور نہ اس سے جناب رسول اللہ (صلی اللہ علیہ وآلہ وسلم) کی نماز ٹوٹی۔ پس اس سے یہ ثابت ہوگیا کہ نماز میں نماز کی درست کے لیے گفتگو جائز ہے اور بھول چوک کر نماز میں گفتگو کرلینے سے نماز نہیں ٹوٹتی۔ دیگر علماء نے ان سے اختلاف کرتے ہوئے کہا نماز میں کلام تکبیر ‘ تہلیل اور قراءت قرآن مجید کے علاوہ جائز نہیں۔ امام کو اگر کوئی چیز پیش آجائے تو اسے بھی کلام جائز نہیں۔ ان کی دلیل ذیل کی روایات ہیں۔
تخریج : عزاہ العینی الی البزاز۔
حاصل روایات : ان روایات سے معلوم ہوتا ہے کہ امام کو بھی نماز میں ہونے والی کمی سے متعلق گفتگو اور مقتدیوں کو نماز میں رہ جانے والی کمی سے متعلق گفتگو اور بھول کر کلام قاطع نماز نہیں ہے کیونکہ ذوالیدین کو واضح فرمایا گیا کہ نہ نماز میں کمی ہوئی نہ میں بھولا اور آپ اپنے کو نماز میں یقیناً نہ سمجھتے تھے۔ پس اس سے ثابت ہوا کہ جب جناب نبی اکرم (صلی اللہ علیہ وآلہ وسلم) نے گزشتہ نماز پر بناء فرمائی ہے اور یہ گفتگو نہ آپ کی نماز کے لیے قاطع بنی اور نہ ذوالیدین کی نماز کے لیے قاطع بنی تو ایسا کلام جو اصلاح نماز سے تعلق رکھتا ہو وہ نماز میں مباح ہے اور بھول کر کلام بھی نماز کے لیے قاطع نہیں ہے۔