٢٥٤٨: سفیان نے عاصم سے نقل کیا پھر انھوں نے اپنی سند سے روایت نقل کی ہے اور اس میں یہ اضافہ ہے کہ نیا حکم یہ ملا ہے کہ تم نماز میں کلام مت کرو۔ پس اس ارشاد میں جناب رسول اللہ (صلی اللہ علیہ وآلہ وسلم) نے اس بات کی اطلاع دی کہ اللہ تعالیٰ نے نماز میں کلام کو منسوخ کردیا ہے اور آپ نے اس میں کسی چیز کو مستثنیٰ نہیں کیا۔ پس اس سے یہ دلالت میسر ہوگئی کہ ہر وہ کلام جس کو وہ نماز میں کرلیا کرتے تھے وہ منسوخ کردی گئی۔ یہ روایات کے معانی کو درست رکھنے کی ایک صورت ہے۔ البتہ بطور نظر وفکر اس کی صورت یہ ہوگی۔ ہم نے دیکھا کہ بعض چیزوں میں بندے جب داخل ہوتے ہیں تو ان کو بعض چیزوں سے منع کردیا جاتا ہے۔ ان میں سے ایک نماز ہے کہ یہ کلام اور ان افعال سے روک دیتی ہے جو اس سے غیر متعلق ہیں۔ اسی طرح دوسرے نمبر پر روزہ ہے۔ یہ جماع اور کھانے پینے سے روک دیتا ہے اور تیسرا حج وعمرہ ہیں جو کہ جماع ‘ خوشبو سے لباس سے روک دیتا ہے۔ ایک ان میں سے اعتکاف ہے جو کہ جماع اور تصرفات (تجارت) سے روک دیتا ہے۔ پس جس آدمی نے روزہ کی حالت میں جماع کرلیا یا بھول کر کھا پی لیا اس کا حکم مختلف فیہ ہے۔ بعض لوگ کہتے ہیں کہ آثار کی پیروی کرتے ہوئے اس کا روزہ نہ ٹوٹے گا اور بعض لوگ کہتے ہیں کہ اس کا روزہ ٹوٹ جائے گا اور جو شخص حج یا عمرہ یا اعتکاف کی حالت میں جان بوجھ کر یا بھول کر جماع کرلیتا ہے تو وہ ان اعمال سے باہر ہوجائے گا۔ پس جن امور کو جان بوجھ کر کرنے سے وہ عبادت سے خارج ہوجاتا ہے اگر وہ بلا قصد و ارادہ بھی کرلے تب بھی وہ اس عبادت سے نکل جاتا ہے اور نماز میں جان بوجھ کر کلام یہ نماز کو توڑ دیتا ہے۔ اس مذکور بات پر قیاس و نظر کا تقاضا یہ ہے کہ جب کلام بھول کر کی جائے تو تب بھی نماز ٹوٹ جائے اور جان بوجھ کر کلام یا بھول کر حکم برابر ہو جیسا کہ اعتکاف و حجر وعمرہ میں جماع کا حکم بھول اور قصد میں برابر ہے اور یہ بات معانی آثار کی تصحیح کے موافق ہے اور امام ابوحنیفہ ‘ ابو یوسف ‘ محمد (رح) کا یہ قول ہے۔ اگر کوئی یہ سوال کرے کہ جناب رسول اللہ (صلی اللہ علیہ وآلہ وسلم) نے حضرت معاوی بن حکم (رض) کو نماز کے لوٹانے کا حکم نہیں فرمایا جبکہ انھوں نے اس میں گفتگو کی۔ تو ان کے جواب میں ہم یہ کہیں گے کہ ان کے ہاں اس وقت تک کلام کے نماز میں حرام ہونے کی حجت قائم نہ ہوئی تھی اس وجہ سے جناب رسول اللہ (صلی اللہ علیہ وآلہ وسلم) نے ان کو اعادہ نماز کا حکم نہیں فرمایا۔ رہا وہ شخص جو کلام کے نماز میں منسوخ ہونے کی حجت کو جان چکا تو اسے کلام کی صورت میں لوٹانا لازم ہے اور اس بات کا احتمال بھی موجود ہے کہ جناب رسول اللہ (صلی اللہ علیہ وآلہ وسلم) نے ان کو نماز کے لوٹانے کا حکم فرمایا ہو مگر ان کی اپنی روایت میں وہ منقول نہ ہوا۔ بعض علماء کا کہنا ہے کہ جناب رسول اللہ (صلی اللہ علیہ وآلہ وسلم) نے ذوالیدین والے دن سجدہائے سہو بھی نہیں فرمائے۔ مستدل روایت ذیل میں ہے۔
تخریج : مسلم فی المساجد نمبر ٣٤۔
حاصل روایات : جناب رسول اللہ (صلی اللہ علیہ وآلہ وسلم) نے اس میں یہ خبر دی ہے کہ نماز میں گفتگو کرنا منسوخ ہوچکا ہے اور آپ (صلی اللہ علیہ وآلہ وسلم) نے اس میں سے کسی چیز کو مستثنیٰ نہیں فرمایا اس سے یہ خودبخود ثابت ہوگیا کہ پہلے جو کلام بھی نماز میں کرتے تھے وہ تمام کا تمام منسوخ کردیا گیا۔
آثار کو سامنے رکھ کر ہم نے ان کے معانی کا قریب ترین مفہوم بیان کردیا۔
نظر طحاوی (رح) :
ہم نے غور سے دیکھا کہ تمام عبادات میں داخل ہونے سے جہاں کچھ چیزیں کرنا پڑتی ہیں تو دوسری چیزوں سے روک دیا جاتا ہے مثلاً جب نماز میں داخل ہوں تو کلام اور دیگر افعال کھانا پینا چلنا سب ممنوع قرار دیئے جاتے ہیں۔
جب روزے میں داخل ہوں تو جماع اور کھانے پینے سے روک دیا جاتا ہے۔
جب حج وعمرہ میں داخل ہوں تو جماع ‘ خوشبو اور سلے کپڑوں سے روک دیا جاتا ہے۔
جب اعتکاف میں داخل ہوں تو جماع اور تجارت وغیرہ کی ممانعت کردی جاتی ہے پس روزے میں جماع کرنے والا یا بھول کر کھانے والے کا حکم بعض کے ہاں یہ ہے کہ اس کا روزہ نہ ٹوٹے گا جیسا کہ آثار میں وارد ہے اور بعض کہتے ہیں اس کا روزہ ٹوٹ گیا۔
حج وعمرہ میں جماع کرنے یا اعتکاف میں جماع کرنے والا خواہ عمداً ہو یا نسیاناً اس کا حج وعمرہ اعتکاف باطل ہوجائے گا اس کے متعلق عمد و غیر عمد کا ایک ہی حکم ہے۔
اب نماز کو لیا تو اس پر سب کا اتفاق ہے کہ نماز میں عمداً کلام تو نماز کو فاسد کردیتا ہے پس نظر کا تقاضا یہ ہے کہ بھول کر کلام کرنے والے کا بھی یہی حکم ہو اور کلام کا حکم سہو و عمد میں برابر ہے۔
نظر کے اعتبار سے بھی ہم نے آثار کے معانی کے مطابق مسئلہ کو ثابت کردیا ہمارے ائمہ ثلاثہ ابوحنیفہ ‘ ابو یوسف ‘ محمد (رح) کا یہی مسلک ہے۔
ایک اشکال :
معاویہ بن حکم سلمی والی روایت میں کلام سے ممانعت تو فرمائی گئی مگر اعادہ کا حکم کیوں نہیں فرمایا۔
جواب : اعادہ کا حکم اس لیے نہیں فرمایا کہ کلام سے ممانعت کا حکم پہلے نہ ہوا تھا جب ممانعت کردی گئی تو اس کے بعد کرنے والے کو اعادہ کا حکم دیا جائے گا۔
اور یہ بھی ممکن ہے کہ آپ (صلی اللہ علیہ وآلہ وسلم) نے ان کو اعادہ کا حکم فرمایا جو اس روایت میں مذکور نہیں اور عدم ذکر عدم وجود کی علامت نہیں ہوتی۔
مسئلہ سجدہ سہو
حاصل روایات :: یہاں ایک مسئلہ سجدہ سہو سے متعلق ضمناً ذکر کر رہے ہیں سجدہ سہو کا باب تو گزشتہ صفحات میں گزر چکا ہے صرف یہاں زہری (رح) کی تردید کرنا چاہتے ہیں۔
زہری (رض) کا قول یہ ہے کہ ذوالیدین والے دن آپ (صلی اللہ علیہ وآلہ وسلم) نے سجدہ سہو نہیں کیا جیسا اس روایت میں ہے۔