٢٥٦٨: عطاء نے روایت کی ہے کہ ابن عباس (رض) کو ایک آدمی نے سلام کیا جبکہ وہ نماز میں مصروف تھے آپ نے اس آدمی کو جواب نہ دیا مگر ہاتھ سے اسے کچوکا لگایا۔ جب جناب رسول اللہ (صلی اللہ علیہ وآلہ وسلم) نے نماز میں سکون کا حکم فرمایا تو اشارہ سے سلام کا جواب اس حکم کی مخالفت ہے۔ کیونکہ اس میں ہاتھ کا بلند کرنا اور انگلیوں کا حرکت دینا ہے۔ اس سے یہ بات ثابت ہوگئی کہ نماز میں تسکین کے حکم میں اعضاء و اطراف کو نماز میں پر سکون رکھنا بھی شامل ہے۔ یہ قول جو اس باب میں بیان ہوا یہ امام ابوحنیفہ ‘ ابو یوسف ‘ محمد (رح) کا قول ہے۔
حاصل کلام :
ابن عباس (رض) نے بھی نماز میں سلام کرنے والے کو جواب نہیں دیا بلکہ ناپسند کرتے ہوئے کچوکا لگایا اور ابن مسعود (رض) اور جابر (رض) نے جناب رسول اللہ (صلی اللہ علیہ وآلہ وسلم) کو نماز میں سلام کیا اور آپ (صلی اللہ علیہ وآلہ وسلم) کے بعد نمازی پر سلام کو ناپسندیدہ قرار دیا۔
اس سے یہ بات ثابت ہوگئی کہ جناب نبی اکرم (صلی اللہ علیہ وآلہ وسلم) کا اشارہ مبارک جس کو انھوں نے معلوم کیا وہ سلام کا جواب نہ تھا بلکہ سلام سے منع کرنا مقصود تھا کیونکہ نماز سلام کی جگہ نہیں اس لیے کہ سلام کلام کی جنس ہے اور سلام کے جواب میں کلام انس ہے۔
اور نماز بالاتفاق کلام کی جگہ نہیں تو سلام کے جواب کی جگہ بھی نہ بنے گی اور جناب رسول اللہ (صلی اللہ علیہ وآلہ وسلم) نے تو تمام جوڑوں کو سکون و اطمینان سے رکھنے کا حکم فرمایا ہے۔