٢٥٨٢ : عبداللہ بن صالح نے اپنی روایت میں محمد بن عمر بن حضرت علی (رض) سے نقل کیا۔ یہ روایت صہیب و عبیداللہ والی مذکورہ روایت کے موافق ہے جس کا فصل اوّل میں ہم تذکرہ کر آئے۔ ہم دوبارہ کتے کے نمازی کے سامنے سے گزرنے کے مسئلہ کی طرف لوٹتے ہیں کہ اس سے نماز ٹوٹ جائے گی یا نہیں۔ حضرت ابن عباس (رض) کی شروع باب میں جو روایت گزری ہے اس سے تو کتا گزرنے سے نماز ٹوٹ جاتی ہے۔ پھر ہم نے حضرت فضل (رض) کی روایت بھی ذکر کی جو اس کے خلاف ہے۔ پھر ہم نے ابن عباس (رض) کا جناب رسول اللہ (صلی اللہ علیہ وآلہ وسلم) کے بعد فتویٰ ذکر کیا جو عکرمہ کی روایت سے نقل ہوا کہ کتا نماز کو نہیں توڑتا۔ اس سے اس بات کو ثبوت مل گیا کہ ان کے ہاں یہ حکم منسوخ ہوچکا اور فضل (رض) والی روایت ابن عباس (رض) کی روایت سے متأخر ہے۔ البتہ حضرت ابو ذر (رض) نے جناب رسول اللہ (صلی اللہ علیہ وآلہ وسلم) سے یہ روایت نقل کی ہے کہ آپ نے سیاہ اور دیگر کتوں میں فرق کیا ‘ سیاہ کتے کو نماز کے لیے توڑنے والا قرار دیا ان کے علاوہ کو عدم قاطع اور آپ (صلی اللہ علیہ وآلہ وسلم) سے اس سلسلہ میں پوچھا گیا تو فرمایا : سیاہ کتا شیطان ہے۔ پس اس سے یہ دلالت مل گئی کہ توڑنے کا باعث سیاہ کتے کا شیطان ہونا ہے۔ اب ہم مزید روایات پر نظر ڈالتے ہیں کہ آیا اس کے معارض کوئی روایت موجود ہے۔ چنانچہ ملاحظہ ہو۔ ابن ابی مریم نے اپنی روایت میں محمد بن عمر بن حضرت علی (رض) سے پھر اپنی سند سے روایت نقل کی ہے البتہ ان الفاظ کا فرق ہے کہ رسول اللہ (صلی اللہ علیہ وآلہ وسلم) ‘ عباس (رض) کے پاس آئے۔
حاصل کلام :
یہ روایت اور صہیب و عبیداللہ کی وہ روایت جو انھوں نے ابن عباس (رض) سے کی ہے اس کے موافق ہے جس میں گدھے کا گزرنا نماز کو نہ توڑنے والا بتلایا گیا ہے۔
کتے وغیرہ کے گزرنے سے نماز ٹوٹتی ہے یا نہیں :
فصل اول میں ابن عباس (رض) کی روایت تو ظاہر کرتی ہے کہ نماز ٹوٹ جاتی ہے مگر فضل (رض) کی روایت نمبر ٢٥٧٩ اس کے خلاف گزری پھر جناب ابن عباس (رض) کا فتویٰ عکرمہ کی زبان سے فضل (رض) کی روایت کی حمایت میں اوپر نقل کیا گیا کہ ان کا گزرنا نماز کو نہیں توڑتا۔
پس اس سے یہ ثابت ہوگیا کہ ان کے ہاں اپنی بات منسوخ ہوچکی اور اب حکم اسی کے مطابق ہے جو روایت فصل میں موجود ہے کہ آپ نے نماز عصر اس حالت میں ادا فرمائی کہ کتا اور گدھا آپ کے سامنے سے ادھر ادھر آ جا رہے تھے۔
ایک سوال :
عام کتے سے نہیں ٹوٹتی مگر سیاہ کتے سے ٹوٹ جاتی ہے۔
جواب : آپ سے جب اس کے متعلق سوال کیا گیا تو آپ نے فرمایا وہ شیطان ہے اس سے معلوم ہوا کہ ٹوٹنے کا سبب کتا نہیں بلکہ شیطان ہے۔
اب روایات پر غور کرتے ہیں کہ آیا اس کے کوئی روایت معارض موجود ہے یا موافق ہی ملتی ہیں۔