٢٥٩٩: عبداللہ بن شداد کہتے ہیں کہ میری خالہ میمونہ بنت الحارث نے مجھے بیان کیا کہ میرا بستر جناب رسول اللہ (صلی اللہ علیہ وآلہ وسلم) کے مصلیٰ کے سامنے ہوتا بسا اوقات آپ کا کپڑا مجھ پر آپڑتا جبکہ آپ نماز ادا فرما رہے ہوتے تھے۔ امام طحاوی (رح) فرماتے ہیں کہ یہ کثیر روایات جو جناب رسول اللہ (صلی اللہ علیہ وآلہ وسلم) سے مروی ہیں اس بات کو ثابت کر رہی ہیں کہ انسان کے گزرنے سے نماز نہیں ٹوٹتی۔ بلکہ ابن عمر اور ابو سعید (رض) نے اپنی مرویات میں جناب نبی اکرم (صلی اللہ علیہ وآلہ وسلم) سے نقل کیا کہ ہر گزرنے والا شیطان ہے اور حضرت ابو ذر (رض) کی روایت جناب رسول اللہ (صلی اللہ علیہ وآلہ وسلم) سے یہ بتلا رہی ہے کہ سیاہ کتا نماز کو توڑ دیتا ہے کیونکہ وہ شیطان ہے۔ پس قطع کی علت جس نے نماز کو توڑ دیا ‘ شیطان بتلائی گئی جو حیوان و انسان جو نمازی کے آگے سے گزریں دونوں میں بتلائی اور دوسری روایت میں جناب رسول اللہ (صلی اللہ علیہ وآلہ وسلم) سے یہ ثابت ہوچکی کہ انسان کا گزرنا قاطع صلوۃ نہیں ہے اور اس مذکورہ بالا بیان کی درستی کی دلیل یہ ہے کہ ابن عمر (رض) سے جناب نبی اکرم (صلی اللہ علیہ وآلہ وسلم) سے روایت کرنے کے ساتھ ساتھ آپ کی وفات کے بعد ابن عمر (رض) کا یہ قول منقول ہے کہ مسلمان کی نماز کی کسی چیز کا گزرنا بھی قاطع نماز نہیں ہے۔
تخریج : بخاری فی الصلاۃ باب ١٠٧‘ مسلم فی الصلاۃ ٢٧٣‘ ابن ماجہ فی الاقامہ باب ٤٠‘ نمبر ٩٥٨۔
حاصل روایات : ان کثیر روایات سے یہ بات ثابت ہوتی ہے کہ انسان کے آگے سے گزرنے یا لیٹنے سے نماز منقطع نہیں ہوتی اور ابن عمر ‘ ابو سعید ] کی روایات میں تو نمازی کے سامنے سے گزرنے والے کو شیطان کہا گیا ہے اور ابو ذر (رض) کی روایت میں سیاہ کتے کو نماز توڑنے والا قرار دیا کیونکہ وہ شیطان ہے اس لیے نماز کو توڑ دیتا ہے اب نماز کو قطع کرنے والی علت تو ہر گزرنے والے میں موجود ہے خواہ وہ انسان ہو یا حیوان اور آپ (صلی اللہ علیہ وآلہ وسلم) سے یہ بات ثابت ہوچکی کہ انسانوں کے گزرنے سے نماز نہیں ٹوٹتی تو انسان کے علاوہ بھی کسی چیز کے گزرنے سے نماز نہیں ٹوٹتی۔
روایت ابن عمر (رض) کا جواب :
حضرت ابن عمر (رض) کی وہ روایت جو فصل اول میں گزر چکی اس کے خلاف ان کا فتویٰ مذکور ہے ملاحظہ ہو۔