٢٦٢٤: ابن ابی لیلیٰ نے عبداللہ بن حکیم (رض) سے نقل کیا کہ جناب رسول اللہ (صلی اللہ علیہ وآلہ وسلم) کا خط مبارک ہم کو پڑھ کر سنایا گیا ہم اس وقت جہینہ کے علاقہ میں تھے میں اس وقت بھرپور جوان تھا خط کا مضمون یہ تھا مردار سے دباغت کر کے یا اس کے پٹھے سے ہرگز فائدہ مت اٹھاؤ۔
تخریج : بخاری فی البیوع باب ١٥١‘ الذبائح باب ٣‘ ابو داؤد فی اللباس باب ٣٩‘ نمبر ٤١٢‘ ترمذی فی اللباس باب ٧‘ نمبر ١٧٢٩‘ نسائی فی الفرع والعتیرۃ باب ٤‘ ٥‘ ابن ماجہ فی اللباس باب ٢٦‘ نمبر ٣٦١٣‘ دارمی فی الاضاحی باب ٢٠‘ مسند احمد ٤؍٣١٠۔
امام طحاوی (رح) فرماتے ہیں بعض لوگوں کا خیال یہ ہے کہ مردار جانور کا چمڑہ پاک نہیں ہوتا خواہ اس کو رنگ لیا جائے اور اس پر نماز بھی درست نہیں۔ انھوں نے اس سلسلہ میں مندرجہ بالا روایات سے استدلال کیا ہے۔ مگر دیگر علماء نے ان سے اختلاف کرتے ہوئے کہا جب مردار کے چمڑے یا اس کے پٹھوں کو دباغت دے دی جائے تو وہ پاک ہوجاتے ہیں ان سے نفع اٹھانے اور ان پر نماز پڑھنے میں کوئی حرج نہیں۔ پہلے قول والوں کیء خلاف ان کی دلیل حضرت ابن ابی لیلیٰ (رض) والی روایت سے ہے۔ جس کو ہم نے ذکر کردیا کہ جناب نبی اکرم (صلی اللہ علیہ وآلہ وسلم) نے فرمایا کہ ” مردار کے چمڑے اور پٹھوں سے مت نفع حاصل کرو “ کا مطلب یہ بھی ہوسکتا ہے کہ جب تک وہ مردار ہے اور اس کو دباغت نہیں دی گئی اس وقت تک اس سے فائدہ حاصل نہ کرو۔ کیونکہ جب مردار کی چربی کے متعلق سوال کیا گیا تو آپ (صلی اللہ علیہ وآلہ وسلم) نے سائل کو اسی طرح کا جواب دیا۔ روایات ذیل میں ہیں۔
خلاصہ الزام : امام مالک و احمد جواب کے ہاں مردار کا چمڑہ پٹھے کی طرح دباغت سے پاک نہیں ہوتا۔ اسی طرح ہڈی و سینگ بھی ناپاک ہیں۔ نمبر دو احناف و شوافع کے ہاں مردار کی کھال دباغت سے اور پٹھے سب پاک ہوجاتے ہیں البتہ شوافع سینگ وغیرہ کو ناپاک قرار دیتے ہیں۔
فریق اوّل کا مؤقف اور دلیل : مردار کی کھال دباغت سے ناپاک رہتی ہے اور پٹھے بھی اسی طرح ان سے فائدہ نہیں اٹھاسکتے۔ دلائل یہ ہیں۔