٢٦٧٣: عبدالرحمن بن مہران نے ابوہریرہ (رض) سے روایت نقل کی ہے جبکہ ان کی وفات کا وقت آیا تو فرمانے لگے مجھے جلد دفن کے لیے لے جانا جناب رسول اللہ (صلی اللہ علیہ وآلہ وسلم) نے فرمایا جب نیک آدمی کو چار پائی پر رکھ دیا جاتا ہے تو وہ کہتا ہے مجھے آگے بھیجو ‘ آگے بھیجو۔ اور جب برے آدمی کو چارپائی پر رکھا جاتا ہے تو وہ کہتا ہے ہائے میری ہلاکت ! تم مجھے کہاں لے جا رہے ہو۔ امام طحاوی (رح) فرماتے ہیں کہ بعض علماء نے کہا کہ جنازہ کے ساتھ جلدی چلنا آہستہ چلنے سے افضل ہے۔ انھوں مندرجہ بالا آثار سے دلیل لی ہے۔ دیگر علماء نے ان کی بات سے اختلاف کرتے ہوتے کہا کہ مناسب رفتار سے چلنا زیادہ افضل ہے۔
تخریج : بخاری فی الاجنائز باب ٥١‘ ٥٣‘ نسائی فی الجنائز باب ٤٤‘ مسند احمد ٢؍٢٩٢۔
حاصل روایات : ان روایات سے ظاہر ہو رہا ہے کہ جنازے کو جلد لے جانے کا اہتمام کرنا چاہیے تاکہ نیک کو اس کے ٹھکانے تک پہنچایا جائے اور برے کو اپنے کندھوں سے اتارا جائے۔
لغات : انتھز۔ ڈانٹنا۔ جمز۔ تیز دوڑنا۔ رمل ۔ کندھے ہلا کر دوڑنا۔
فریق ثانی کا مؤقف مع دلائل : جنازے کو آرام سے نرمی کے ساتھ لے کر چلنا چاہیے دلیل یہ روایات ہیں۔