٢٧٠٠: مجاہد کہتے ہیں میں ابن عمر (رض) کے پاس بیٹھا تھا ان کے پاس سے ایک جنازہ گزرا ابن عمر (رض) کھڑے ہوگئے پھر فرمایا تم بھی اٹھو میں نے جناب رسول اللہ (صلی اللہ علیہ وآلہ وسلم) کو ایک یہودی کا جنازہ گزرتے وقت کھڑے ہوتے دیکھا ان سے سوال ہوا کیا تم کو ان کے ساتھ جانا مناسب ہے اس لیے جنازے کے ساتھ جانے میں ثواب ہے ؟ (وہ اٹھ کر چل دیئے) ہم دونوں اس کے ساتھ چلتے گئے آپ کی نظر جنازہ کے آگے کچھ لوگوں پر پڑی میں نے کہا یہ جنازہ والے کے متعلقین ہیں یہ لوگ جنازہ کے ساتھ نہیں۔ وہ لوگ ساتھ ہیں جو اس کے دونوں اطراف اور پیچھے ہیں چلتے ہوئے انھوں نے ایک رونے والی عورت کو سنا میرا ہاتھ پکڑ کر مجھے گھمایا اور اس کے سامنے کر کے فرمایا تو بہت بری ہے کہ اس جنازہ کے اجر سے محروم کر رہی ہے اے مجاہد جاؤ! تو تو اجر کا خواستگار تھا اور یہ گناہ چڑھا رہی ہے جناب رسول اللہ (صلی اللہ علیہ وآلہ وسلم) نے ایسے جنازے کے ساتھ جانے سے روکا ہے جس کے ساتھ بین کرنے والی ہو۔ اگر کوئی معترض یہ کہے کہ یہ کس طرح ثابت ہوگیا کہ جنازے کے پیچھے چلنا آگے چلنے سے افضل ہے۔ حالانکہ حضرت عمر (رض) صحابہ کرام کی موجودگی حضرت زینب کے جنازے میں لوگوں کو اس سے آگے بڑھاتے تھے ۔ پس اس سے یہ ثابت ہوگیا کہ وہ پیچھے چلنے کی کوئی اصل نہ پاتے تھے۔ اگر ایسا نہ ہوتا تو آپ پیچھے چلنے کو بھی مباح قرار دیتے ؟ اس کے جواب میں اس طرح عرض کریں گے ‘ کہ تمہاری یہ بات کیسے درست ہے۔ حالانکہ حضرت علی (رض) کا قول گزرا کہ ان دونوں حضرات کا مقصد یہ ہے کہ وہ لوگوں کو سکھاتے ہیں کہ جنازے پیچھے چلنا آگے چلنے سے افضل ہے۔ پھر ان کا یہ طرز عمل اختیار کرنا تو اس کا مطلب ہمارے نزدیک یہ ہے۔ (واللہ اعلم) کہ یہ کسی عارضہ کی وجہ سے تھا۔ خواہ ان عورتوں کی وجہ سے جو ان کے پیچھے تھیں تو آپ نے مردوں عورتوں کے اختلاط کو ناپسند کیا ۔ اس سے انھوں نے مردوں کو جنازے سے آگے بڑھ جانے کا حکم فرمایا ۔ تو اس کا سبب یہ عارضہ تھا نہ یہ کہ یہ چلنے سے افضل ہے۔ میں نے یونس سے سنا کر وہ ابن دھب سے یہ بیان کرتے اور کہتے کہ اس نے یہ بات خود کہنے والے سے سنی ۔ اس حدیث کا یہ معنی کرنا زیادہ بہتر ہے تاکہ یہ اس روایت کے خلاف نہ ہو ۔ جس کو حضرت علی (رض) نے سابقہ سطور میں حضرت ابوبکر اور عمر (رض) کے متعلق ذکر کیا ہے۔
لغات : کنفیھا۔ دونوں اطراف۔ رابہ۔ بین کرنے والی عورت۔ استدار۔ گھمایا۔
تخریج : ابن ماجہ فی الجنائز باب ٥٧‘ مسند احمد ٢؍٤٢٧‘ ٥٢٨۔
ایک اہم سوال :
جنازہ میں پیچھے چلنے کو کس طرح افضل کہا جاسکتا ہے جبکہ ام المؤمنین زینب (رض) کے جنازے میں حضرت عمر (رض) نے صحابہ کرام (رض) کی موجودگی میں لوگوں کو جنازے سے آگے چلنے کا حکم فرمایا اگر وہ پیچھے چلنے کو افضل سمجھتے تو وہ آگے چلنے کا کیوں حکم فرماتے اس سے تو یہ معلوم ہو رہا ہے کہ وہ پیچھے چلنے کو درست نہ سمجھتے تھے۔
الجواب :
تمہارا یہ کہنا درست نہیں ہے کیونکہ حضرت علی (رض) نے فرمایا کہ ابوبکر و عمر ] جانتے ہیں کہ جنازے کے پیچھے چلنا آگے چلنے سے افضل ہے پھر عمر (رض) کی بات کا یہ مطلب تم کس طرح لے سکتے ہو عمر (رض) آگے چلنے کا حکم یا تو اس لیے دیا کہ کچھ عورتیں وہاں چلی آرہی تھیں مردوں کے ساتھ ان کے اختلاط کو روکنے کے لیے مردوں کو آگے چلنے کا حکم فرمایا اس لیے نہیں کہ وہ آگے چلنے کو افضل قرار دیتے تھے مشہور تابعی اسود (رح) کا طرز عمل اس کی تصدیق کرتا ہے۔
حاصل اثر : یہ اسود (رح) ہیں ‘ جنہوں نے ابن مسعود ‘ عمر فاروق ‘ علی مرتضیٰ ] کی طویل صحبت پائی ہے وہ جنازے سے آگے اسی وقت چلتے ہیں جب کوئی عارضہ پیش آجاتا ہے ورنہ پیچھے چلتے ہیں بس گزشتہ روایت کا مفہوم بھی یہی ہوگا اور عمر (رض) کے فعل کو جو جنازہ زینب میں پیش آیا اسی قسم کے عارضہ پر محمول کریں گے۔
مزید تائید ملاحظہ فرمائیں۔