٢٧٣٤: مجاہد نے ابن سخرہ سے نقل کیا کہ ہم علی (رض) کے ساتھ ایک جنازہ کی انتظار میں بیٹھے تھے کہ وہاں سے ایک اور جنازہ گزرا تو ہم کھڑے ہوگئے تو آپ نے فرمایا تم کیوں کھڑے ہوئے میں نے کہا اے اصحاب محمد (صلی اللہ علیہ وآلہ وسلم) تم اس سلسلے میں ہمیں کیا فرماتے ہو تو ابو موسیٰ (رض) کہنے لگے جناب رسول اللہ (صلی اللہ علیہ وآلہ وسلم) نے فرمایا جب تم کسی مسلمان یا یہودی یا نصرانی کا جنازہ دیکھو تو کھڑے ہوجاؤ کیونکہ تم اس شخص کے لیے کھڑے نہیں ہوتے ہو بلکہ تم ان فرشتوں کے لیے کھڑے ہوئے ہو جو اس کے ساتھ ہیں۔ حضرت علی (رض) نے اس روایت میں اس بات کی خبردی کہ کہ جناب رسول اللہ (صلی اللہ علیہ وآلہ وسلم) ابتداء میں ایک مرتبہ کھڑے ہوتے اس کا مقصد اہل کتاب کے ساتھ مشابہت تھی اور اپنے سے پہلے انبیاء اسلام کے طریقے کی پیروی تھی یہاں تک کہ اللہ تعالیٰ نے آپ کو اس کے خلاف نیا حکم دے دیا اور وہ بیٹھنے کا حکم تھا۔ اس سے وہ بات ثابت ہوئی جس کی طرف ہم حدیث عبادہ کا رخ موڑا ہے۔ حضرت علی (رض) فرمانے لگے ایک مرتبہ یہ عمل رسول اللہ (صلی اللہ علیہ وآلہ وسلم) نے کیا اور آپ کی عادت مبارکہ اہل کتاب سے مشابہت کی تھی جب اس سے روک دیا جاتا تو آپ اسے چھوڑ دیتے۔
تخریج : بخاری فی الجنائز باب ٤٩۔
اس روایت میں علی (رض) نے واضح بتلایا کہ جناب رسول اللہ (صلی اللہ علیہ وآلہ وسلم) ابتداء میں ایک مرتبہ اہل کتاب کی مشابہت میں کھڑے ہوئے اور پہلے انبیاء (علیہم السلام) کی اقتداء کرتے ہوئے یہ کیا یہاں تک کہ اس کے خلاف حکم آیا اور وہ بیٹھنے کا حکم تھا۔
پس اس سے حدیث عبادہ (رض) کی صحیح توجیہ ہوگئی۔