٢٧٣٨: عبداللہ بن بریدہ نے سمرہ بن جندب (رض) سے روایت کی ہے کہ میں نے جناب رسول اللہ (صلی اللہ علیہ وآلہ وسلم) کے پیچھے ام کعب کا جنازہ پڑھا جو کہ حالت نفاس میں فوت ہوگئیں تھیں آپ جنازے کے لیے میت کے درمیان یعنی سینہ کے برابر کھڑے ہوئے۔
تخریج : بخاری فی الجنائز باب ٦٣ مسلم فی الجنائز نمبر ٨٧‘ ابو داؤد فی الجنائز باب ٥٣‘ نمبر ٣١٩٥‘ ترمذی فی الجنائز باب ٤٥‘ نمبر ١٠٣٥‘ ابن ماجہ فی الجنائز باب ٢١‘ نمبر ١٤٩٣‘ مسند احمد ٥؍١٤‘ ١٩۔
امام کو جنازہ پڑھاتے وقت میت کے کس عضو کے برابر کھڑے ہو کر جنازہ پڑھانا چاہیے اس کے متعلق کتب مذاہب میں باہمی متضاد قول منقول ہیں صاحب نخب الافکار کا قول تقریباً جامع معلوم ہوتا ہے۔ (١) امام ابوحنیفہ ‘ احمد رحمہم اللہ کے ہاں مرد و عورت کے سینہ کے برابر کھڑے ہوں گے ۔ (٢) امام شافعی ‘ ابو یوسف ‘ محمد (رح) کے ہاں عورت کی کمر اور مرد کے سر کے برابر کھڑے ہوں گے۔ نخب الافکار جلد ٤ ص ١٩٣۔
فریق اوّل کا مؤقف اور دلائل : مرد و عورت کے سینہ کے برابر کھڑا ہوا جائے اس کو احناف نے مفتیٰ بہ قرار دیا ہے دلائل یہ روایات ہیں۔