٢٧٥٠: صالح بن ابی صالح نے ابوہریرہ (رض) انھوں نے جناب نبی اکرم (صلی اللہ علیہ وآلہ وسلم) سے نقل کیا کہ جس نے کسی میت پر مسجد میں جنازہ پڑھا اس کو کچھ ثواب نہیں۔ جب اس سلسلہ میں جناب رسول اللہ (صلی اللہ علیہ وآلہ وسلم) سے منقولہ روایات مختلف ہیں۔ پہلی روایات میں صراحت کے ساتھ مسجد میں نماز جنازہ کا تذکرہ ہے اور دوسری فصل میں مذکورہ روایت کراہت ظاہر کرتی ہیں۔ اس وجہ سے ہمیں ضرورت پڑی تاکہ یہ معلوم ہو کہ متاخر روایات کونسی ہیں اور ان کو پہلی روایات کا ناسخ قرار دیں۔ پس جب روایت عائشہ (رض) میں اس بات کی دلیل ہے کہ صحابہ کرام نے مسجد میں نماز جنازہ کو ترک کردیا تھا ۔ جب کہ پہلے مسجد میں یہ عمل ہوتا تھا ۔ پھر ان کے فعل سے اٹھ گیا اور عام لوگوں میں اس کی پہچان بھی نہ رہی ۔ تو یہ سلسلہ حضرت عائشہ صدیقہ (رض) کے ہاں کسی کراہت جدیدہ کی وجہ سے نہ تھا ۔ بلکہ ان کے ہاں یہ اس لیے تھا کہ صحابہ کرام (رض) کو مسجد میں نماز جنازہ کی بھی اجازت تھی اور اس کے علاوہ دوسری جگہ بھی پڑھ سکتے تھے اور ان کا دوسری جگہ ادا کرنا مسجد میں پڑھنے کی کراہت کا ثبوت نہیں ۔ جیسا کہ اس کا عکس مسجد میں پڑھنا دوسری جگہ پڑھ لینے کی کراہت پر دلیل نہ تھی۔ پس انھوں نے جناب رسول اللہ (صلی اللہ علیہ وآلہ وسلم) کے بعد حضرت سعد (رض) کی وفات کے دن یہ بات فرمائی تو اصحابہ رسول اللہ (صلی اللہ علیہ وآلہ وسلم) اور تابعین رحمہم اللہ اس کا انکار کیا۔ اور حضرت ابوہریرہ نے مسجد میں نماز جنازہ کے پڑھنے کے حکم منسوخ ہونے کے سلسلہ میں خود جناب رسول اللہ (صلی اللہ علیہ وآلہ وسلم) سے سنا تھا۔ آپ (صلی اللہ علیہ وآلہ وسلم) کا مسجد میں پہلے جنازہ ادا کرنا اور پھر اس کو چھوڑنا یہ اس کے نسخ کا ثبوت ہے اور یہ روایت حضرت عائشہ صدیقہ (رض) نے اس روایت میں جناب رسول اللہ کے اس فعل کی خبر دی ہے جو مباح ہونے کی ہالت میں تھا اور اس وقت تک ممانعت کی اطلاع ہے جس سے پہلے جواز تھا پس حضرت ابوہریرہ (رض) والی روایت حضرت صدیقہ (رض) کی روایت سے اولیٰ ہے۔ کیونکہ یہ اس کے لیے ناسخ ہے اور یہ صحابہ کرام کا اس عمل سے انکار اس بات کی دلیل ہے کہ ان کو ام المؤمنین کے قول کے خلاف علم تھا ۔ اگر ان کو معلوم نہ ہوتا تو وہ مخالفت نہ کرتے اور یہ جو ہم نے مسجد میں نماز جنازہ کی کراہت اور ممانعت کا تذکرہ کیا ہے۔ یہ امام ابوحنیفہ اور محمد جواب کا قول ہے۔ امام ابو یوسف (رح) کا قول بھی یہی ہے۔ البتہ اطلاع کرنے والوں نے امام ابو یوسف (رح) سے اس طرح نقل کیا کہ آپ نے فرمایا جب مسجد خاص جنازہ کی نماز کے لیے بنائی گئی ہو تو اس میں نماز ہ جنازہ پڑھنے میں کچھ حرج نہیں۔
تخریج : ابو داؤد فی الجنائز باب ٥٠‘ نمبر ٣١٩١‘ ابن ماجہ فی الجنائز باب ٢٩‘ نمبر ١٥١٧‘ باختلاف یسیر من اللفظ۔
کشف حقیقت :
جب جناب رسول اللہ (صلی اللہ علیہ وآلہ وسلم) سے روایات جنازے کے مسجد میں مباح اور مکروہ کے سلسلہ میں مختلف ہوگئیں تو اب ناسخ و منسوخ کو پہچاننا ضروری ہے۔
روایت عائشہ (رض) سے یہ بخوبی معلوم ہوتا ہے کہ مسجد میں جنازہ ہوتا تھا پھر فعلی طور پر متروک ہوگیا اور عام لوگوں نے اس کو جان لیا حضرت عائشہ (رض) کے ہاں یہ ترک کراہت کی وجہ سے نہ تھا بلکہ اس کی وجہ یہ تھی کہ اپنے جنازے کے وہ ولی ہیں ان کو مسجد سے باہر پڑھنے یا مسجد میں پڑھنے کا اختیار حاصل ہے کسی اور جگہ پر ان کا نماز پڑھنا مسجد میں جنازے کی کراہت کی دلیل نہیں جیسا کہ ان کا نماز جنازہ مسجد میں پڑھنا دوسری جگہ پڑھنے کی کراہت کی دلیل نہیں اسی لیے انھوں نے سعد بن ابی وقاص (رض) کی وفات پر وہ بات فرمائی جو اوپر مذکور ہوئی۔
مگر اصحاب رسول اللہ (صلی اللہ علیہ وآلہ وسلم) نے ان کے اس قول پر نکیر فرمائی ابوہریرہ (رض) کو جناب رسول اللہ (صلی اللہ علیہ وآلہ وسلم) سے مسجد میں نماز جنازہ کے حکم کا منسوخ ہونا معلوم تھا اور وہ جانتے تھے کہ آپ کا یہ چھوڑنا پہلے حکم کو منسوخ کرنے والا ہے حضرت عائشہ (رض) کی روایت سے ان کا قول اس لیے اولیٰ ہے کہ اس روایت میں فعل رسول اللہ (صلی اللہ علیہ وآلہ وسلم) کا تذکرہ ہے جو اباحت کے زمانہ سے متعلق ہے جبکہ ممانعت نہ ہوئی تھی اور نمبر ٢ روایت ابوہریرہ (رض) اس لیے بھی اولیٰ ہے کہ وہ ناسخ اور متأخر ہے۔
نمبر 3: اصحاب رسول اللہ (صلی اللہ علیہ وآلہ وسلم) کا انکار اس بات کی دلیل ہے کہ وہ اس کا منسوخ ہونا جانتے تھے اگر نہ جانتے تو انکار نہ کرتے اور عائشہ (رض) کو اس کا علم نہ تھا۔
نمازِ جنازہ کے مسجد میں ممنوع ہونے کا یہ قول ہمارے ائمہ امام ابوحنیفہ (رح) محمد (رح) ابو یوسف (رح) کا قول ہے۔
البتہ امالی ابو یوسف (رح) میں ایک مزید مسئلہ تحریر کیا گیا ہے کہ اگر کوئی مسجد خاص جنائز کے لیے بنائی گئی ہو تو اس میں جنازہ ادا کرنے میں کوئی کراہت نہیں ہے۔
نوٹ : امام طحاوی (رح) نے یہاں امام محمد (رح) کے نام کو ابو یوسف (رح) سے مقدم نقل کیا کیونکہ ان کا اس مسئلہ میں ایک گونہ اختلاف تھا اس کی طرف اشارہ کرنے کے لیے آخر میں ان کا قول بمع اختلاف ذکر کردیا اس باب میں جواز اور شدید کراہت کا اختلاف ہے یہ باب نظر طحاوی (رح) سے خالی ہے۔