٢٨٢٨: شریک نے جابر سے اس نے اپنی اسناد سے روایت بیان کی ہے البتہ روایت میں اتنا فرق ہے کہ اس نے سولہ ماہ کہا ہے یا اٹھارہ ماہ کہا ہے۔ یہ آثار بچوں پر نماز جنازہ کو ثابت کرتے ہیں۔ پس روایات میں ظاہری طور پر تضاد ہے۔ تو یہ غور کرنا چاہیے کہ مسلمانوں کا معمول کیا چلا آرہا ہے۔ تاکہ اس پر عمل کیا جائے اور وہ دوسرے حکم کا ناسخ ہو ۔ تو مسلمانوں کی عادت بچوں پر نماز جنازہ کا ادا کرنا ہے۔ پس جو روایات اس کے مطابق ہیں وہ ثابت ہوگئیں اور مخالف روایات کی خود نفی ہوگئی آثار کے پیش نظر اس باب کا حکم یہ ہے باقی نظر و فکر کے لحاظ سے اس کی صورت یہ ہے ہم دیکھتے ہیں کہ مرنے والے بچوں کو بالا تفاق غسل دیا جاتا ہے اور یہ بھی ہمارے سامنے ہے کہ جن بالغین کو غسل دیتے ہیں ان پر نماز جنازہ بھی پڑھتے ہیں۔ اور جن کو غسل نہیں دیا جاتا (جیسے شہداء) تو ان کی نماز جنازہ میں اختلاف ہے پس بعض کی نماز جنازہ پڑھی گئی اور بعض کی نہ پڑھی گئی ۔ پس جہاں غسل ہے اس کے بعد نماز ہے اور بعض اوقات جنازہ تو پڑھتے ہیں۔ مگر اس سے پہلے غسل نہیں ہوتا ۔ تو جب بچوں کو بھی بڑوں کی طرح غسل دیا جاتا ہے۔ تو اس سے ثابت ہوا کہ بالغوں کی طرح ان کی نماز جنازہ بھی پڑھی جائے ‘ اس باب میں قیاس اسی بات کو چاہتا ہے اور مسلمانوں کا معمول بھی اسی طرح ہے۔ چنانچہ امام ابوحنیفہ ‘ ابو یوسف اور محمد رحمہم اللہ کا مسلک یہی ہے ‘ اور یہی بات صحابہ کرام (رض) کی ایک جماعت سے بھی مروی ہے ۔
حاصل روایات : ان آثار میں بچوں پر نماز جنازہ کا ثبوت موجود ہے اب ان روایات کا تقاضا تو یہی ہے کہ بچوں پر نماز جنازہ پڑھی جائے۔
امت کے اجماعی عمل سے تائیدی دلیل۔
اب آثار میں متضاد روایات ہونے کی وجہ سے مسلمانوں کے عمل پر نگاہ ڈالی جائے گی جو کہ ان کی عادت ثانیہ کے طور پر منقول چلا آ رہا ہے یہ عمل خود اس بات کا شاہد ہوگا کہ پہلا حکم منسوخ ہے مسلمانوں کی شروع زمانہ سے عادت چلی آرہی ہے کہ وہ بچوں پر نماز جنازہ پڑھتے ہیں پس جو آثار اس کے مطابق ہیں وہ ثابت و قائم ہیں جبکہ دوسرے منتفی ہیں۔
نظر طحاوی (رض) :
مسلمان بالاتفاق مرنے والے چھوٹے بچوں کو غسل و کفن دیتے ہیں اور بالغوں کے متعلق غسل و کفن کے بعد نماز جنازہ سب کے ہاں مسلّم ہے اور شہداء جن کو غسل نہیں دیا جاتا ان کی نماز جنازہ میں اختلاف ہے بعض ان پر نماز کے قائل ہیں جبکہ دوسرے نہیں۔ اور جن کو غسل دیا جاتا ہے ان کی نماز تو بہرحال پڑھی جاتی ہے اگرچہ کبھی نماز پڑھی جاتی ہے اور غسل نہیں دیا جاتا (جیسے شہداء)
حاصل روایات : پس نتیجہ یہ نکلا کہ جب بچوں کو بالغوں کی طرح غسل دیا جاتا ہے تو ان پر نماز بدرجہ اولیٰ ثابت ہونی چاہیے جیسا کہ بالغوں پر نماز پڑھی جاتی ہے۔
پس بتقاضائے نظر بھی بچوں پر نماز کا ثبوت مل گیا امام ابوحنیفہ ‘ ابو یوسف ‘ محمد رحمہم اللہ کا یہی قول ہے۔